Nókis qalasında Sanaat Texnoparkin qurıwdıń koncepciyasın islep shıǵıw máseleleri talqılandı

Qaraqalpaqstan Respublikası Ministrler Keńesiniń Baslıǵı F.Ermanov «Ostim» kompaniyaları toparı basqarıw keńesi baslıǵınıń orınbasarı, bas direktor Adem Ariji hám «Ostim Global» ózbek-túrk sanaat klasteri basqarıw direkciyasınıń atqarıwshı direktorı Jamshid Xidoyatov penen ushırastı.

Onda Nókis qalasında Sanaat Texnoparkin qurıw koncepciyasın islep shıǵıw boyınsha sóylesiwler alıp barıldı. Sonday-aq, aymaqtıń sanaat potencialın arttırıw, innovaciyalıq texnologiyalardı tartıw, óndiris quwatlıqların keńeytiw hám jańa jumıs orınların jaratıw máseleleri dodalandı.

Aytıp ótiw orınlı, húrmetli Prezidentimizdiń Qaraqalpaqstan ushın ayrıqsha qabıl etilgen Pármanına muwapıq Tikleniw hám rawajlanıw fondınıń 40 mln. dollar procentsiz kredit qarjıları esabınan Nókis qalasında sanaat texnoparkin shólkemlestiriw ushın islep shıǵarıwǵa mólsherlengen imarat hám obektlerdi qurıw, sonday-aq, ishki injenerlik-kommunikaciya tarmaǵına jalǵaw jumısları alıp barılıwı belgilengen.

Ótkerilgen ushırasıw dawamında kommerciyalıq usınıs hám shártnama shártleri kelisip alındı.