Joqarǵı Keńes Baslıǵı Tórtkúl, Beruniy, Taxtakópir, Qaraózek, Bozataw hám Qanlıkól rayonlarındaǵı isbilermenler menen ushırastı
Isbilermenler búgingi kúnde ekonomikamızdıń rawajlanıwında salmaqlı úles qosıw menen birge, jańa jumıs orınların jaratıwda da áhmiyetli esaplanadı. Olardıń jumısların qollap-quwatlawda bolsa, tikkeley jaqınnan pikirlesiw arqalı mashqalalarına sheshim tabıw búgingi kúnniń talabı ekenligin ayrıqsha aytıwımız kerek.
Usı baǵdardaǵı ámeliy jumıslardıń dawamı sıpatında Joqarǵı Keńes Baslıǵı Amanbay Orınbaev basshılıǵındaǵı Nókis qalasında ushırasıw bolıp ótti.
Onda jańa joybarlardı iske túsiriwde ushırasıp atırǵan mashqalalardı anıqlaw hám olardı saplastırıw, investiciyalıq joybarlardı iske túsiriw, sanaat ónimlerin islep shıǵarıwshı kárxanalardıń tolıq quwatlıqta islewin támiyinlew máseleleri talqılandı.
Onda Tórtkúl, Beruniy, Taxtakópir, Qaraózek, Bozataw hám Qanlıkól rayonlarındaǵı isbilermenler, usı rayon hákimleri hám juwapker bolǵan ministrlik, mákeme basshıları qatnastı.
Búgingi ótkerilgen ushırasıwda ayırım taraw juwapkerleriniń óz jumısına nemquraydılıq penen qarawı hám basqa da sebeplerge baylanıslı ushırasıp atırǵan mashqalalar boyınsha jaqınnan pikirlesildi, isbilermenlerdi qıynap kelgen mashqalalar tıńlandı hám bildirilgen múrájatlardıń basım kópshiligine ornında sheshimin tabıw ilajları kórildi. Waqıt talap etiletuǵın múrájatlar qadaǵalawǵa alınıp, tez pursatta unamlı sheshiw boyınsha tiyisli taraw basshılarına tapsırmalar berildi.
