Tórtkúl rayonında xalıqtıń abadan turmısın arttırıw baǵdarında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonındaǵı bir qatar sociallıq obektler, sonday-aq, isbilermenler jumısları menen jaqınnan tanıstı.

Dáslep, «Yangihayot» MPJdaǵı «Lochin chorva kompleksi» fermer xojalıǵınıń júzimshilikti rawajlandırıw, «Bahor» MPJdaǵı ıssıxanasında banan jetistiriwdi jolǵa qoyǵan qıytaq jer iyesi Atajan Urazimbetovtiń jumısları kózden ótkerdi. Egislik maydanın mol dáramat deregine aylandırıp, jaqsı nátiyje kórsetip atırǵan bunday miynetkesh insanlardıń jumısları kópshilikke úlgi bolıwı kerek ekenligi atap ótildi. 

Bunnan soń, «Yashnaobod» MPJdaǵı 44-sanlı mektepte oqıwshılardıń sabaqtan tıs waqıtların nátiyjeli shólkemlestiriw boyınsha jolǵa qoyılǵan jumıslar úyrenildi. Keleshek iyeleri bolǵan balalarǵa tálim-tárbiya beriw menen birge kásip-ónerge de baǵdarlaw hár bir mektepte bolıwı kerek ekenligi ayrıqsha tilge alındı.

«Ziyokor» MPJ aymaǵındaǵı Prezidentimizdiń tapsırması menen qáwenderlik esabınan jańadan qurılıp atırǵan, 660 orınǵa mólsherlengen jańa mektep, «Shodlik MPJda jańadan qurılıp atırǵan «Otajon Xudayshukurov» atındaǵı amfiteatr, «EVRO-AZIA» JShJ tárepinen jańadan qurılıp atırǵan 119 kvartiralı kóp qabatlı úylerdiń qurılısı barısı da kózden ótkerildi. Juwapkerlerge tiyisli tapsırmalar berildi.

Bunnan keyin, «Twrtkwl shisha idishlari» JShJ hám «Nurota» APJdaǵı «Dunyo med stroy» JShJne qaraslı jańadan iske túsiriliw aldında turǵan klinika kózden ótkerildi. Isbilermenler jumısın qollap-quwatlaw, olardıń óz biznesin rawajlandırıwı ushın jaqınnan járdem beriw boyınsha juwapkerlerge anıq tapsırmalar berildi.