Tortkúl rayonın sociallıq-ekonomikalıq jaqtan rawajlandırıw máseleleri kórip shıǵıldı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonında respublikalıq mákeme-shólkemler, rayon belsendileri qatnasıwında májilis ótkerdi. 

Onda rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hámde investiciyalıq joybarlardı ámelge asırıw baǵdarındaǵı berilgen tapsırmalar boyınsha is-ilajlar baǵdarlamasınıń sonday-aq, aldınǵı májilis dáwirinde berilgen tapsırmalardıń orınlanıwı máseleleri qarap shıǵıldı.

Atap ótiw orınlı, rayondı hár tárepleme rawajlandırıw boyınsha arnawlı baǵdarlama tiykarında bir qatar wazıypalar belgilep berilgen. Degen menen, ayırım orınlarda bar bolǵan múmkinshilikler tolıq iske qosılmay atır.

Atap aytqanda, máhállelerdegi jumıslardıń ámelde orınlanıwı, abadanlastırıw, pukaralardıń bántligin támiyinlew baǵdarında ilajlardıń talap dárejesinde emesligi sınǵa alındı. Juwapkerler eskertilip, ayırımlarına intizamiy jaza sharasın qollaw boyınsha tapsırmalar berildi.

Ótkerilgen májilis dawamında tez pursatta isleniwi tiyis wazıypalar belgilenip, anıq wazıypalar atap ótildi hám óz jumısın orınlawǵa nemquraydılıq penen qarap atırǵan juwapkerlerge intizamiy jaza sharasın qollaw, zárúr bolsa lawazımına ılayıqlıǵı máselesin kórip shıǵıw boyınsha tapsırmalar berildi.