Nókis qalasında Qol urısınıń R1 jѳnelisi boyınsha Professional sportshılar arasında «Aralboyı kubogı» xalıqaralıq turniri ótkerildi

Búgin Nókis qalasındaǵı oraylıq amfiteatrda Qol urısınıń R1 jѳnelisi boyınsha Professional sportshılar arasında «Aralboyı kubogı» xalıqaralıq turniri jarısları bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq qatnasıwshılarǵa áwmet tiledi. 

Bunnan soń turnir bellesiwlerine start berildi. Onda Ázerbayjan, Belarus, Qırǵızstan, Rossiya, Túrkiya hám Italiya mámleketlerinen profesional sportshılar qatnastı. 

62 kg jeńil salmaqta Tosso Petro (Italiya) hám Abdumajid Qosimov (Ózbekstan) bellesiwinde Abdumajid Qosimov jeńimpaz boldı. 70 kg orta salmaqta Medvedeva Aseliya (Belorus) hám  Nilufar Palvonova (Ózbekstan) bellesiwinde Nilufar Palvonova jeńimpaz boldı. 73 kg  orta salmaqta  Abror Xakimov (Qırǵızstan) hám Azizxon Abdullaev (Ózbekstan) bellesiwinde Azizxon Abdullaev qarsılasınan ústem boldı. 80 kg orta salmaqta Nabiev Gunduz (Azerbayjan) hám Aybek Maxsetov (Ózbekstan) arasındaǵı bellesiwde Nabiev Gunduz jeńip shıqtı. 

97 kg salmaq kategoriyası boyınsha Shaxzade Maxsun (Turkiya) hám Begzodbek Maxamatov  (Ózbekstan) arasındaǵı bellesiwde Begzodbek Maxamatov jeńip shıqtı. 

Kúnniń oraylıq bellesiwi 97 kg awır salmaq kategoriyasında Bolotskix Evgeniy (Rossiya) hám Oǵabek Jumaniyazov (Ózbekstan) bellesiwinde Oǵabek Jumaniyazov qarsılasına imkaniyat kaldırmadı.

Keskin bellesiwler, ayawsız soqqılar astında ótken ushırasıwlar jıynalǵanlarda úlken tásir qaldırdı. Jeńimpazlar qutlıqlanıp, olarǵa pul sıylıqları menen estelik sawǵaları tapsırıldı.