Mámleketimiz basshısı barlıq muǵallim, professor hám oqıtıwshılardı qızǵın qutlıqladı

Prezident Shavkat Mirziyoev Muǵallimler hám ustazlar kúni aldınan taraw xızmetkerleri menen sóylesiw ótkermekte. Ilajǵa barlıq aymaqlardan 40 mıńnan aslam pedagoglar qosılǵan.

Sóziniń aldında mámleketimiz basshısı óz ómirin jas áwladqa tálim-tárbiya beriwdey dúnyadaǵı eń ullı iske baǵıshlap kiyatırǵan barlıq muǵallim, professor hám oqıtıwshılardı – bir millionlıq pedagoglar jámáátin mine, usı qutlı bayram menen qızǵın qutlıqladı.

Ótken háptede jankúyer muǵallim hám ustazlar, bilimlendiriw hám ilim pidayılarınıń bir toparın mámleketimizdiń joqarı sıylıqları menen sıylıqlaw haqqında Prezident pármanına qol qoyıldı.

Olardıń arasında taraw xızmetkerleri menen bir qatarda óz qarjısı esabınan bilimlendiriw dárgayların qurǵan, ońlaǵan saqawatlı isbilermenler, bilimlendiriwdegi aldınǵı jetiskenliklerdi engiziwge járdem berip atırǵan sırt elli sheriklerimiz, aymaǵında bilimlendiriwdiń rawajlanıwı ushın zárúr sharayat jaratıp berip atırǵan hákimler de bar.

Mámleketimiz basshısı joqarı ataq, orden hám medallardı óz iyelerine tapsırdı.