Bilimlendiriwdiń sapası joqarı bolǵan mámlekette ekonomika turaqlı ósedi – Prezident

Prezident Shavkat Mirziyoev Muǵallimler hám ustazlar kúni aldınan taraw xızmetkerleri menen sóylesiw ótkermekte.

Keyingi segiz jılda bilimlendiriw hám tárbiya tarawında da on jıllarǵa teń keletuǵın jumıslar ámelge asırılıp, úlken nátiyje hám jetiskenliklerge erisilgeni atap ótildi.

Ótken dáwirde mámleketimiz ekonomikası 2 esege ósti, jıldıń juwmaǵı menen jan basına dáramat 3,5 mıń dollarǵa jetedi. Jalpı ishki ónim kólemi de jıldıń aqırına shekem 130 milliard dollar boladı.

Barlıq tarmaqlarǵa zamanagóy texnologiyalar hám innovaciyalar kirip kiyatırǵanı esabınan bıyıl eksport 25 milliard dollarǵa alıp shıǵıladı. Ótken 8 jılda bolsa mámleketimizge 130 milliard dollar sırt el investiciyası kirgizildi.

Itibarlısı, burın investiciya tiykarınan shiyki zat resurslarına kirgizilgen bolsa, házir hár bir tarawda jańa ónimlerdi islep shıǵarıw, infrastrukturanı jaqsılawǵa qaratılmaqta.

-Men bul ekonomikalıq kórsetkishlerge ne ushın kóp toqtap atırman? Sebebi ekonomika qanshelli bekkem bolsa, bilimlendiriw rawajlanadı. Bilimlendiriwdiń sapası joqarı bolǵan mámlekette bolsa ekonomika turaqlı ósedi. Bul – turmıs nızamı! – dedi mámleketimiz basshısı.