Prezidentimiz baqsha tárbiyashıları ushın áhmiyetli jańalıqtı ayttı

Házirgi waqıtta 7 mıńnan aslam mámleketlik baqshalarda 120 mıńǵa shamalas pedagog bolsa da, olardıń tek ǵana 34 procenti joqarı maǵlıwmatqa iye. Biraq házirgi waqıtta tárbiyashılardıń mektep muǵallimleri sıyaqlı kategoriyanı alıwı ushın joqarı oqıw ornı diplomı talap etiledi. Sol sebepli joqarı maǵlıwmatlı hám orta maǵlıwmatlı tárbiyashınıń aylıǵında ayırmashılıq bar.

Sonlıqtan, mámleketlik hám jeke menshik baqsha tárbiyashıların jumıstan ajıralmaǵan halda joqarı oqıw orınlarında oqıtıw jolǵa qoyılıp, jılına 10 mıń tárbiyashı joqarı maǵlıwmatlı boladı.

Jáne bir jańalıq. Tap Prezident mektepleri sıyaqlı hár bir wálayatta “Jańa áwlad” baqshaları shólkemlestirilip, olarda tárbiyashılar aldınǵı pedagogikalıq texnologiyalardı úyrenedi.

Eń áhmiyetlisi, jańa metodikalardı úyreniw ushın bul orınlardıń esigi jeke menshik baqsha tárbiyashılarına da bárqulla ashıq boladı.