9-hám 11-klass oqıwshıları ushın birden-bir mámleketlik imtixanlar engiziledi

Prezident Shavkat Mirziyoev Muǵallimler hám ustazlar kúni aldınan taraw xızmetkerleri menen sóylesiw ótkermekte.

-Xalqımızdıń keleshegi mektepten baslanadı. Sebebi perzentlerimizge bilim hám tárbiya beriwdiń eń uzaq dawam etetuǵın, kerek bolsa, sheshiwshi basqıshı bul – mektep bilimlendiriwi, – dedi mámleketimiz basshısı.

Házirgi waqıtta mekteplerde 6,5 million oqıwshı bilim almaqta. Bıyıl mekteplerdi 400 mıńǵa shamalas oqıwshı pitkergen bolsa, 1-klasslarǵa 720 mıń bala qabıl etildi. Sonıń ushın, keyingi segiz jılda 500 ge shamalas jańa mektepler qurılǵanı, barlarınıń keńeytilgeni esabınan 1 million oqıwshı ornı jaratıldı.

Jeke menshik mekteplerge úlken sharayat jaratılǵanı nátiyjesinde ata-analar ushın tańlaw imkaniyatı payda boldı. Búgin 200 mıńnan aslam ul-qızlarımız jeke menshik mekteplerde oqıp atır.

Mektep bilimlendiriwinde jáne bir qatar áhmiyetli ózgerisler ámelge asırılatuǵını atap ótildi.

Jańa oqıw jılınan baslap mektep dáwirinde oqıwshılardıń qábiletine qarap, kásip yamasa joqarı bilimlendiriwge baǵdarlaw ushın 9-hám 11-klass oqıwshıları ushın birden-bir mámleketlik imtixanlar engiziledi. Bul arqalı 400 mıńǵa shamalas 9-klass pitkeriwshileri texnikumlarǵa qamtıp alınadı.

Oqıwdı mektepte dawam ettirip, joqarı oqıw ornına kiriw tileginde bolǵan jaslarǵa pánler tańlaw tiykarında tereńlestirilip ótiledi.

Bir sóz benen aytqanda, mekteptegi juwmaqlawshı imtixan nátiyjeleri menen pitkeriwshiler qálese texnikumǵa, qálese joqarı oqıw ornına kire alatuǵın boladı.