Texnikumlarda da joqarı oqıw orınlarındaǵı sıyaqlı ilimiy dáreje hám ataqlar ushın ústemeler tólew jolǵa qoyıladı

Mámleketimiz basshısı texnikumdaǵı oqıtıwshı hám ustalardıń mamanlıǵın, jámiyettegi abırayın arttırıw boyınsha da jańa baslamalardı alǵa qoydı.

Sonıń ishinde, mekteptegi sıyaqlı texnikumlardıń oqıtıwshı hám ustaları ushın kásiplik sertifikatlaw sisteması engiziledi.

Bul arqalı texnikum ustazlarına milliy sertifikat ushın aylıǵınıń 30 procenti, xalıqaralıq sertifikatqa bolsa 50 procenti muǵdarında ústeme tólenedi.

Sonıń menen birge, texnikum direktorı hám orınbasarlarına mekteptegi kásipleslerinen kem bolmaǵan aylıq beriledi. Eger olar “Direktorlar mektebi”nde menedjerlik sertifikatın alsa, jáne qosımsha 20 procent ústeme tólenedi.

Endi texnikumlarda da joqarı oqıw orınlarındaǵı sıyaqlı ilimiy dáreje hám ataqlar ushın ústemeler tólew jolǵa qoyıladı.

Hár jılı 500 oqıtıwshı aldınǵı sırt el bilimlendiriw shólkemlerine, jáne 500 usta bolsa sırt eldegi iri kárxanalarǵa stajirovkaǵa jiberiledi.