Birlesken Arab Ámirlikleriniń “Abu-Dabi rawajlanıw fondı” basshıları Qaraqalpaqstanǵa keldi
Birlesken Arab Ámirlikleriniń “Abu-Dabi rawajlanıw fondı” Bas direktorı Mohamed Saif Al Suwaidiy basshılıǵındaǵı hám Shorlanıw sharayatında biodiyqanshılıq xalıqaralıq orayı bas direktorı Tarifa Al Zaabi qatnasıwındaǵı delegaciya Qaraqalpaqtanǵa keldi hám Aralboyı xalıqaralıq innovaciya orayında shólkemlestirilgen ilajda qatnastı.
Ilajdıń tiykarǵı maqseti “Abu-Dabi rawajlanıw fondı”nıń qarjılay qollap-quwatlawı menen IKBA, Ѳzbekstan Respublikası Ekologiya ministrligi, Qaraqalpaqstan Respublikası húkimeti, Aralboyı xalıqaralıq innovaciya orayı, Qaraqalpaqtan diyqanshılıq ilim-izertlew institutı hám bir qatar mápdar shólkemler menen birgelikte ámelge asırılıp atırǵan “Qaraqalpaqstannıń degradaciyaǵa ushıraǵan aymaqlarında turaqlı awıl xojalıǵı óndiris sistemaların rawajlandırıw” joybarı sheńberinde erisilgen áhmiyetli nátiyjeler menen tanısıp, joybar sheńberinde qurılǵan Integraciyalasqan agro-akvakultura sistemaları pilot joybarın saltanatlı túrde iske túsiriwden ibarat.
Miymanlar menen ushırasıwda Qaraqalpaqstan Respublikası Ministrler Keńesi baslıǵı F.Ermanov, Joqarǵı Keńes Baslıǵınıń orınbasarı R.Nurazizov qatnastı hám miymanlardı Qaraqalpaqstan Respublikasında mámleketimiz basshısı baslamaları menen ámelge asırılıp atırǵan reformalar, joybarlar hám aldaǵı rejeler menen tanıstırıp ѳtti.
Atap ótilgenindey, búgingi joybardıń nátiyjeleri hám ámelge asırılıp atırǵan jumıslar tek ǵana Qaraqalpaqstan ushın emes, al pútkil Aralboyı regionı, sonday-aq, global kólemde ıqlım ózgeriwiniń unamsız tásirlerine beyimlesiw hám olardı jumsartıw jolında áhmiyetli qádem bolıp esaplanadı. Bul baslama turaqlı awıl xojalıǵı, azıq-awqat qáwipsizligi hám xalıqtıń turmıs sapasına unamlı tásir kórsetedi. Onda aldaǵı waqıtta bunday birge islesiwler kѳlemin jáne de keńeytiw boyınsha bir qatar usınıslar da berildi.
Ilajda dawamında joybar sheńberinde ámelge asırılǵan jumıslardıń nátiyjeleri boyınsha Aralboyı xalıqaralıq innovaciya orayı direktorı B.Xabibullaev perezentaciya jasadı.
Mohamed Saif Al Suwaidi bul baslamanı ıqlım ózgeriwi aqıbetlerine beyimlesiw hám suw resurslarınan nátiyjeli paydalanıw jolındaǵı úlken qádem sıpatında bahalap, Qaraqalpaqstanda ámelge asırılıp atırǵan jumıslar regiondaǵı ekologiyalıq turaqlılıq hám xalıqtıń abadanlıǵı ushın úlken áhmiyetke iye ekenin atap ótti.
Ushırasıwdan soń Integraciyalasqan agro-akvakultura sistemaları pilot joybarı saltanatlı túrde iske túsirildi. Bul sistema járdeminde sazan balıqları, shorlanıwǵa shıdamlı eginler hám spirulina suw otı jetistiriw jolǵa qoyıladı. IAAS sistemasınıń tiykarǵı innovaciyası - suw resurslarınan aqılǵa uǵras paydalanıw, awıl xojalıǵı hám akvakulturanı birlestirgen halda turaqlı óndiriske erisiw bolıp esaplanadı.
