Tórtkúl - Ellikqala - Beruniy aylanba jolın rekonstrukciyalaw máseleleri talqılandı

Qaraqalpaqstan Respublikası Ministrler Keńesiniń Baslıǵı F.Ermanov Aziya rawajlanıw bankiniń qubla, oraylıq hám batıs Aziya aymaqları boyınsha vice-prezidenti Inmin Yang basshılıǵındaǵı delegaciya menen ushırastı.

Onda dáslep, sońǵı jılları elimizde xalqımızdıń abadan turmısın támiyinlew baǵdarında húrmetli Prezidentimizdiń baslamaları menen ámelge asırılıp atırǵan jumıslar, sonday-aq, bul baǵdarda Aziya rawajlanıw banki menen birgelikte ámelge asırılıp atırǵan joybarlar keń túrde atap ótildi.

Bunnan soń, bank qatnasıwında ámelge asırılıwı názerde tutılǵan xalıqaralıq áhmiyettegi A-380 «Ǵuzar-Buxara-Nókis-Beynew» avtomobil jolınıń Ámiwdárya, Beruniy, Ellikqala hám Tórtkúl rayonları aymaǵınan ótken bólegin rekonstrukciyalaw joybarı kórip shıǵıldı. 

Atap ótiw orınlı, Aziya rawajlanıw bankiniń 233,1 mln. dollar qarız qarjıları tiykarında A380 avtomobil jolınıń Qaraqalpaqstan Respublikasınan ótken derlik 87 km bólegin rekonstrukciyalaw belgilengen edi. Joybar sheńberinde 75 km uzınlıqtaǵı jańa aylanba jol («Tórtkúl - Ellikqala – Beruniy») qurılısı hám bar bolǵan A380 avtomobil jolınıń 12 km bólegin qayta qurıw rejelestirilgen.

Ushırasıw dawamında, Aziya Rawajlanıw banki qatnasıwındaǵı joybarlar infrastruktura menen baylanıslı mashqalalardı sheshiw, elimiz ekonomikasın bekkemlew, xalqımızdıń turmıs abadanlıǵın arttırıwǵa xızmet etetuǵınlıǵı ayrıqsha tilge alınıp, birge islesiw jumısları bunnan-bılayda dawam ettiriletuǵınlıǵı atap ótildi.