Ámiwdárya rayonında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ámiwdárya rayonında xalıqtıń turmıs abadanlıǵın arttırıw baǵdarında ámelge asırılıp atırǵan jumıslar boyınsha úyreniw jumısların alıp bardı.

Dáslep, «Beshtom» máhállesi aymaǵındaǵı «Amu karavan hotel» JShJ tárepinen shólkemlestirilgen miymanxana xızmeti joybarı kórip shıǵıldı. Joqarǵı Keńes Baslıǵına aldaǵı rejeler tanıstırıldı.

Bunnan soń, «CHoykwl» APJ aymaǵındaǵı «CHoykwl Dwstlik» fermer xojalıǵı atız maydanında Qıtay mámleketinen alıp kelingen paxta teriw mashinasınıń jumıs processi, jańa texnikanıń imkaniyatları kózden ótkerildi. «Bekman Allaberganov» fermer xojalıǵınıń egislik maydanındaǵı terimshiler halınan da xabar alınıp, harmasın aytıldı hám aldınǵı terimshilerge sawǵalar tapsırıldı.

Joqarǵı Keńes Baslıǵı «Aybek» máhállesindegi «Oybek mebel» JShJ tárepinen jolǵa qoyılǵan mebel islep shıǵarıw joybarı, «Yoqubboy Ashirov» fermer xojalıǵı tárepinen Qıtay texnologiyası tiykarında iske túsirilgen paxta, ǵálle hám basqa da dánli egin tuqımların qayta islew joybarı menen tanısıp, isbilermenlerdiń jumısın qollap-quwatlaw, olarǵa jaqınnan járdem beriw boyınsha juwapkerlerge anıq tapsırmalardı berdi.

«Dwrmon» awıl puqaralar jıyını aymaǵında «Sayxunabad tájiriybesi» tiykarında bir kontur-bir ónim ólshemi menen jańadan shólkemlestirilgen ıssıxanalar jumısı da kózden ótkerildi. 

Ámiwdárya rayonında ámelge asırılıp atırǵan jumıslardı kózden ótkeriw barısında Qıtay mámleketinen kelgen investorlar shólkemlestiriwindegi «EverPROSPER INVESTMENT CONSULTING» JShJ tárepinen «Jańa Ózbekstan» massivi aymaǵında 600 kvartiralı kóp qabatlı turaq jaylardı qurıw joybarına start berildi.