Joqarǵı Keńes Baslıǵı Kegeyli, Shımbay, Ámiwdárya, Ellikqala, Shomanay, Moynaq hám Nókis rayonlarındaǵı isbilermenler menen ushırastı

Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan Sawda-sanaat palatasınıń Qaraqalpaqstan Respublikası basqarmasında mámleketlik baǵdarlamalarǵa kirgizilgen joybarlar baslamashıları bolǵan isbilermenler menen ushırastı.  

Onda dáslep, húrmetli Prezidentimiz tárepinen Qaraqalpaqstanda isbilermenlikti rawajlandırıw, regionnıń investiciyalıq tartımlıǵın arttırıw baǵdarında óz aldına qabıl etilgen qarar hám pármanları tiykarında berilgen jeńillikler, jaratılǵan imkaniyatlar haqqında keń túrde atap ótildi.

Bunnan soń jańa joybarlardı iske túsiriwde ushırasıp atırǵan mashqalalardı anıqlaw hám olardı saplastırıw, investiciyalıq joybarlardı iske túsiriw, sanaat ónimlerin islep shıǵarıwshı kárxanalardıń tolıq quwatlıqta islewin támiyinlew boyınsha isbilermenlerdi qıynap kiyatırǵan mashqalalar hám usınısları tıńlandı.

Onda Kegeyli, Shımbay, Ámiwdárya, Ellikqala, Shomanay, Moynaq hám Nókis rayonlarındaǵı isbilermenler, juwapker basshılar qatnastı. 

Ushırasıw dawamında isbilermenlerdi qıynap kelgen máseleler tıńlandı hám bildirilgen múrájatlardıń basım kópshiligine ornında sheshimin tabıw ilajları kórildi. Waqıt talap etiletuǵın múrájatlar qadaǵalawǵa alınıp, tez pursatta unamlı sheshiw boyınsha tiyisli taraw basshılarına tapsırmalar berildi.