Qaraqalpaqstanda sociallıq xızmetler kórsetiw kólemi arttırılmaqta
Mámleketimizde húrmetli Prezidentimizdiń basshılıǵında xalqımızdıń turmıs abadanlıǵın arttırıw boyınsha keń kólemli ilajlar ámelge asırılmaqta. Bul baǵdarda Ózbekstanda sociallıq qorǵaw sistemasın jetilistiriw jumısları mámleketlik siyasattıń baslı baǵdarlarınıń birine aylandı desek aljaspaǵan bolamız. Sebebi, jańa redakciyadaǵı bas nızamımızda da «Jańa Ózbekstan - sociallıq mámleket» degen princip qatań belgilep berilip, usı arqalı «Insan qádirin ulıǵlaw» degen iygilikli ideya tiykarındaǵı ámeliy jumıslar jańa basqıshlarǵa alıp shıǵılmaqta.
Jaqın qısqa dáwir ishinde sociallıq qorǵaw sistemasın jetilistiriw maqsetinde Prezident janındaǵı Sociallıq qorǵaw milliy agentligine burın óz aldına xızmet etken onlaǵan sociallıq qorǵaw, mayıplıq hám kámbaǵallıqqa qarsı gúresiw baǵdarlamaları jámlestirilip, puqaralarımızǵa sociallıq xızmetlerdi kórsetiw sapası arttırıldı. Sapalı bilimlendiriw hám medicinalıq xızmet, balalar, hayal-qızlar, kekseler, mayıplıǵı bolǵan shaxslardı hár tárepleme qollap-quwatlaw, bántligin támiyinlew hám turaq jay menen támiyinleniwi máselelerine sheshim tabıw boyınsha jumıslarǵa ayrıqsha pát endirildi. Álbette, bul xızmetler arqalı, mıń-mıńlap puqaralardıń turmısı jaqsılanıwına erisildi.
Jaqın 2 jıldıń ishinde, xızmetlerdi sanlı platforma arqalı birlestiriw nátiyjesinde Ózbekstan boyınsha 92 mıńnan aslam mayıplıǵı bolǵan shaxsqa jumıs tabıwda, 10 mıńǵa shamalas shaxstıń erkin miynet etiwdi baslawına jaqınnan járdem berildi. Qaraqalpaqstanda bolsa 5,5 mıńnan aslam mayıplıǵı bolǵan shaxstıń jumıs tabıwına járdem berildi.
Ózbekstan boyınsha «Kámbaǵallıq reestri»ne bolsa, 621 mıń shańaraq kirgizilgen bolsa, Qaraqalpaqstanda bul kórsetkish 39 089 shańaraqtı quradı hám reestrge kirgizilgen hár bir shańaraq ushın individual reje islep shıǵılıp, islengen ámeliy jumıslar nátiyjesinde búgingi kúnde 7 837 shańaraq kámbaǵallıqtan shıǵarıldı.
Sonday-aq, «Jalǵız kekseler reestri» arqalı mámleketimiz boyınsha kúndelikli turmısın erkin basqara almaytuǵın 17 mıń 800 adam qamtıp alınǵan bolsa, Qaraqalpaqstanda 1 411 adam qamtıp alındı hám búgingi kúnge shekem 200 den aslam shaxs dizimnen shıǵarıldı. 392 ózgeler kútimine mútáj jalǵız hám jalǵız jasawshı hámde mayıplıǵı bolǵan shaxslardıń hújjetlerin rásmiylestiriw hám qayta tiklewge járdemler berildi. Bunnan tısqarı, 2 334 kekse hám mayıplıǵı bolǵan puqaralarǵa salamatlıǵın tiklewi ushın sanatoriyalarǵa jollamalar berildi.
2 090 ayrıqsha bilimlendiriwge mútájligi bolǵan balalardı psixologiyalıq-medicinalıq pedagogikalıq komissiya tekseriwinen ótkeriw ushın arzalar qabıl etilip, 1 159 balaǵa bilimlendiriw mákemeleri ushın jollamalar berildi. Házirgi waqıtta imkaniyatı sheklengen 8 030 bala bilimlendiriwge qamtıp alınǵan. Sonday-aq, 117 ulıwma bilim beriw mekteplerinde shólkemlestirilgen 194 inklyuziv klasslarda 265 bala, 6 korrekcion klasslarda 52 bala bilim almaqta.
Prezident qararı tiykarında mayıplıǵı bolǵan balalar ushın «Kúndizgi kútim xızmeti» shólkemlestirilip, PMPK tárepinen juwmaq berilgen jámi 218 balalar xızmetke qamtıp alındı.
Bunnan tısqarı, jıl basınan 4 601 mayıplıǵı bolǵan shaxslar jańadan dizimge alındı, 3 971 shaxsqa birlemshi mayıplıq toparı, 10 219 shaxsqa qayta mayıplıq toparı belgilendi.
Mayıplıǵı bolǵan shaxslardı sportqa qamtıw maqsetinde respublikamızdaǵı 24 sport mektebinde 115 trener basshılıǵında 910 para sportshı sport penen qamtıp alındı. Bir ǵana usı jıldıń ózinde bul sportshılar tárepinen jáhán hám xalıqaralıq turnir chempionatlarında jámi 147 medal qolǵa kirgizildi.
Prezidentimizdiń tapsırması menen «Belsendi turmısqa qádem» baǵdarlaması sheńberinde bir qatar jumıslar ámelge asırılmaqta. Atap aytqanda, jolǵa qoyılǵan jańa sociallıq xızmetlerdi kórsetiwshi 21 isbilermen, 43 ózin-ózi bánt etken shaxslar, 2 mákeme xızmetleri «Shańaraq birge islesiwshisi» platforması arqalı market pleyste qáliplestirildi. Búgingi kúnde bul xızmetlerden 1810 jalǵız hám jalǵız jasawshı hámde mayıplıǵı bolǵan shaxslar paydalanbaqta.
Usı jılda úy-jayǵa mútáj 87 jetim hám ata-ana qaramaǵınan ayrılǵan balalardı úy-jay menen támiyinlew rejelestirilgen bolıp, sonnan, búgingi kún jaǵdayına 60 turaq jay óz iyelerine tapsırıldı.
Búgingi kúnde Qaraqalpaqstandaǵı 452 máhállede jasawshı xalıqtıń sociallıq qorǵawǵa mútáj qatlamına 109 túrdegi xızmetler kórsetilip kelinbekte. Bunıń nátiyjesinde sociallıq qorǵawǵa mútáj puqaralardıń sociallasıwına erisildi. Álbette, xalqımızdıń sociallıq qorǵawǵa mútáj qatlamına sapalı sociallıq xızmetler kórsetiw, olardıń turmıs sharayatların jaqsılaw hám abadan turmısın támiyinlew jolındaǵı jumıslar bunnan-bılay da dawam ettiriledi.