Qaraqalpaqstanlı jaslar ushın jańalıq: usı jılda da qosımsha 10 mıń kvota ajıratıldı

Húrmetli Prezidentimizdiń ǵamxorlıǵı hám itibarı nátiyjesinde qaraqalpaqstanlı jaslarǵa bir qatar imkaniyatlar jaratıp berilmekte. Usılar qatarında, 2022-jıl 31-avgusttaǵı 213-sanlı Prezident pármanı menen hár jılı Qaraqalpaqstan Respublikasında turaqlı jasaytuǵın hám de ulıwma orta, orta arnawlı hám professional bilimlendiriw shólkemlerin tamamlaǵan jaslar ushın tólemli-kontrakt tiykarında qosımsha kvotalar ajıratılıp kelinbekte.

Bıyılǵı jılda da respublikamızdıń qala hám rayonları ushın zárúr bolǵan mamanlıqlar sanınan hám kadrlardıń ishki mútájliklerinen kelip shıǵıp, 10 mıń qosımsha kvota ajıratıldı. Bunda wálayatlardaǵı joqarı oqıw orınların tańlaǵan abiturientler ushın qosımsha tólemli-kontrakt tiykarında 7 mıń kvota berilgen bolsa, Qaraqalpaqstan Respublikasındaǵı joqarı oqıw orınları ushın 2 mıń kvota, Tashkent qalasındaǵı joqarı oqıw orınları ushın 1000 qosımsha kvota tólemli-kontrakt tiykarında ajıratıldı. 

Álbette, qosımsha kvotalardıń ajıratılıwı bul respublikamız ushın zárúr bolǵan joqarı bilimge iye maman kadrlardı tayarlawda áhmiyetli bolıp, bul óz náwbetinde húrmetli Prezidentimizdiń qaraqalpaqstanlı jaslar ushın ayrıqsha jaratıp bergen imkaniyatlarınıń jáne bir kórinisi boldı desek aljaspaǵan bolamız.