Administraciyası baslıǵınıń orınbasarı Yuridika fakulteti student-jasları menen ushırastı
Berdaq atındaǵı Qaraqalpaq mámleketlik universitetinde áhmiyetli ushırasıw bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Prezident Administraciyası baslıǵınıń sud sistemasın reformalaw boyınsha orınbasarı Nodira Xakimova hám Ózbekstan Respublikası Sudyalar joqarı keńesiniń sudyası Malikaxon Qalandarovalar qatnastı.
Dáslep miymanlar universitette bilimlendiriw processleri hám jaratılǵan sharayatlar menen tanıstı. Bunnan soń Yuridika fakulteti student-jasları menen ushırasıp, sáwbetlesti. Ushırasıwda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimiz keleshegin qurıwda jaslardıń ornı hám juwapkershiligin ayrıqsha atap ótti. Sáwbetlesiw dawamında mámleketimizde sud-huqıq tarawında ámelge asırılıp atırǵan reformalardıń mazmun-mánisi, olardıń jámiyetlik turmıstaǵı áhmiyeti hám jaslar ushın jaratılıp atırǵan keń imkaniyatlar haqqında aytıp ótti.
Studentler menen sáwbetlesiw barısında olardıń sorawları tıńlanıp, huqıqıy sana hám mádeniyattı arttırıw, sonday-aq, jaslardıń huqıqıy tarawda belsene qatnasıwın qollap-quwatlawǵa baylanıslı pikirler bildirildi. Bul ushırasıw studentlerde huqıqıy bilim hám kónlikpelerdi bekkemlew, sonday-aq, olardı sud-huqıq sistemasında alıp barılıp atırǵan keń kólemli reformalardıń mazmunı menen jaqınnan tanıstırıwda ayrıqsha áhmiyetke iye boldı.
