Ámiwdáryada "Úsh áwlad ushırasıwı" ótkerildi

Búgin Ámiwdárya rayonında "Úsh áwlad ushırasıwı" bolıp ótti. Onda respublika hám rayon kólemindegi basshılar, pidayı miynet veteranları, rayonnıń rawajlanıwına úlken úles qosqan tájiriybeli insanlar, sonday-aq, jańa áwlad wákilleri bolǵan jaslar qatnastı.

Miymanlar saltanatlı túrde kútip alındı. Ilaj sheńberinde ónermentlerimizdiń biytákirar qol miyneti ónimleri, isbilermenlerdiń islep shıǵarǵan hár qıylı ónimleriniń kórgizbesi shólkemlestirildi.

Ilajdı ashıp bergen Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov óz sózinde úsh áwlad ushırasıwınıń jámiyetlik-ruwxıy turmısımızdaǵı ornı, jaslardı tárbiyalawdaǵı áhmiyetine ayrıqsha toqtap ótti.

Ilaj dawamında túrli tarawlarda pidákerlik penen miynet etip atırǵan orta áwlad wákilleri, elimizdiń rawajlanıwına úles qosıp kiyatırǵan veteran nuraniylar hám zamanagóy bilimli hám umtılıslı, belsendi jaslar sıylıqlandı.

Onda respublika hám rayon kólemindegi mádeniyat hám kórkem óner wákilleriniń bir-birinen ájayıp qosıq hám ayaq oyınları miymanlar názerine usınıldı.