«Muǵallimler hám ustazlar kúni» múnásibeti menen bayram saltanatı ótkerildi

Búgin Nókis qalasındaǵı Qaraqalpaqstan kórkem óner sarayında «1-oktyabr – Muǵallimler hám ustazlar kúni» múnásibeti menen bayram saltanatı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı kásiplik bayramı menen qutlıqladı.

Atap ótilgenindey, húrmetli Prezidentimiz basshılıǵındaǵı reformalar nátiyjesinde bilimlendiriw tarawın rawajlandırıw boyınsha oǵada úlken nátiyjelerge erisilmekte. Usı iygilikli jumıslardıń dawamı sıpatında barlıq bilim hám tárbiya máskanlarınıń materiallıq-texnikalıq bazası bekkemlenip atır. 

Atap aytqanda, usı jılı barlıq baǵdarlamalar tiykarında jámi 356 mlrd. sumlıq qarjı esabınan 35 mektepte hám 36 baqshada qurılıs-rekonstrukciya jumısları alıp barılıp atır. Bıyılǵı jıldıń ѳzinde joqarı oqıw orınlarında ulıwma bahası 145 mlrd. sumlıq 2150 orınlıq 5 jataqxana paydalanıwǵa tapsırıldı, 3 mektepte xalıqaralıq «Kembridj» oqıw baǵdarlaması eńgizildi. Qaraqalpaqstanlı jaslardı joqarı bilimlendiriwge qamtıp alıw boyınsha ótken úsh jılda 20 mıń, bıyılǵı jılda bolsa qosımsha 10 mıń 750 kvota berilgenligi kewillerdi ayrıqsha maqtanısh sezimlerine bólemekte. 

Búgingi ótkerilgen ilájda mine usınday iygilikli jumıslar haqqında keń túrde sóz etildi.

Bunnan soń Qaraqalpaqstan Respublikası Joqarǵı Keńesiniń Prezidiumı qararı menen bir topar taraw pidayılarına húrmetli ataqlar, kókirek belgileri hám xoshametlew sıylıqları saltanatlı túrde tapsırıldı.

Bayram saltanatı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.