HealthTech AI Hackathon Nókis qalasında start aldı

Búgin Nókis qalasında «HealthTech Hackathon» sınaq basqıshı start aldı.

Onda Qaraqalpaqstan Respublikası Joqarǵı Keńesiniń komitet baslıǵı M.Atamuratov qatnastı hám shıǵıp sóylep, barlıq qatnasıwshılarǵa áwmet tiledi.

Bul ilaj mámlekettegi ulıwma milliy jasalma intellekt xakaton joybarınıń birinshi basqıshı esaplanadı.

AI Hackathon joybarı 2025-jıl oktyabrden 2026-jıl dekabrge shekem basqıshpa-basqısh ámelge asırıladı hám onda 5 mıńnan aslam qatnasıwshı qatnasıp, densawlıqtı saqlaw, bilimlendiriw, sud sisteması, suw xojalıǵı hám isbilermenlik baǵdarları boyınsha innovaciyalıq sheshimlerdi islep shıǵıwı kútilmekte.

Nókiste ótkerilip atırǵan "HealthTech Hackathon"nıń tiykarǵı maqseti - medicina tarawında sanlı transformaciya processlerin jedellestiriw bolıp tabıladı. Joybar mámleketimizdiń medicina jámiyetshiligi hám IT-qánigelerin bir maydanǵa toplap, sanlı densawlıqtı saqlaw baǵdarında jańa sheshimler jaratıw ushın nátiyjeli milliy platforma qáliplestiriwdi názerde tutadı.

Ilaj IT hám medicinalıq joqarı oqıw orınlarınıń studentleri, jas shıpakerler, IT qánigeleri hám medicina mákemeleriniń wákilleriniń qatnasıwında dawam etpekte.