Institutta mekteplerdiń informatika páni muǵallimleri ushın seminar-trening ótkerilmekte

2-oktyabr kúni Ájiniyaz atındaǵı Nókis mámleketlik pedagogikalıq institutında respublikamızdaǵı ulıwma bilim beriw mektepleriniń informatika páni muǵallimleri ushın «Zamanagóy informatikanı oqıtıwda innovaciyalar: jasalma intellekt, kiberqáwipsizlik, qosımsha jaratıw hám nátiyjeli sabaq ótiw» atamasındaǵı seminar-trening baslandı.

Informatika páni muǵallimlerin zamanagóy sanlı tendenciyalar menen tanıstırıw maqsetinde shólkemlestirilgen seminar-treningniń dáslepki kúninde Nókis qalası hám Beruniy rayonı mektepleriniń muǵallimleri qatnastı.

Ilajǵa Qaraqalpaqstan Respublikası Joqarǵı Keńesiniń komitet baslıǵı M.Atamuratov, Ministrler Keńesi Baslıǵınıń orınbasarı B.Otemuratov, Ózbekstandaǵı jetekshi IT qánigesi hám fintex innovatorı U.Ziyamova qatnasıp, házirgi waqıtta málimleme texnologiyalarınıń rawajlanıw tendenciyaları hám turmısımızdaǵı ornı haqqında aytıp ótti.

Seminar-trening dawamında Ózbekstan Respublikası Sanlı texnologiyalar ministrligi janındaǵı Sanlı bilimlendiriw texnologiyaların rawajlandırıw orayı hám Kiberqáwipsizlik universitetinen kelgen qánige trenerler tárepinen jasalma intellekttiń bilimlendiriwde qollanılıwı, kiberqáwipsizlik hám muǵallimniń juwapkershiligi, mobil qosımsha jaratıw tiykarları boyınsha treningler jáne ámeliy shınıǵıwlar ótkerildi.

Seminar-trening dawam etpekte.