Xalıqaralıq forum sheńberinde áhmiyetli ilajlar baslandı

Usı jıldıń 5-6-oktyabr kúnleri Qaraqalpaqstan Respublikasında "Oraylıq Aziya pedagogları - bir region, bir hawaz, bir kúsh" súreni astında Oraylıq Aziya pedagogları xalıqaralıq forumı ótkerilmekte.

Onda Oraylıq Aziya mámleketleri (Ózbekstan, Qazaqstan, Qırǵızstan, Tájikstan, Túrkmenstan) bilimlendiriw ministrlikleri, atap aytqanda, Ázerbayjan hám Túrkiya mámleketleriniń bilimlendiriw sisteması xızmetkerleri, pedagoglar hám keń jámiyetshilik wákilleri qatnasadı.

Forum ilajları sheńberinde qatnasıwshılar Shımbay rayonında boldı. Sapar dawamında olar rayon hákimligi tárepinen shólkemlestirilgen ilajda qaraqalpaq xalqınıń bay milliy dástúrleri, milliy taǵamları hám ónermentshiligi menen jaqınnan tanıstı.

Ilajda qaraqalpaq xalqınıń bay mádeniy miyrası hám dástúriy qádiriyatları miymanlarda úlken tásir qaldırdı.

Forum qatnasıwshıları bunnan keyin Taxtakópir rayonında jaylasqan "Qara tereń" turistlik orayına keldi hám bul jerdegi bir qatar mádeniy-aǵartıwshılıq ilajlarda qatnaspaqta.

Atap aytqanda, etno turistlik aymaqta jaratılǵan sharayatlar, qara úy qurıw processleri, haqıyqıy shól ortalıǵı hámmede birdey qızıǵıwshılıq oyattı. Sonday-aq, aymaqta shólkemlestirilgen qaraqalpaq milliy kórkem óneri úlgileri hám etnografiyalıq kórkem shıǵıwlar miymanlarda úlken tásir qaldırdı.

Kúnniń ekinshi yarımında pedagoglar ushın oqıw-seminar ilajlarınıń shólkemlestiriliwi rejelestirilgen.