«Oraylıq Aziya pedagogları - bir region, bir dawıs, bir kúsh!» sheńberindegi ilajlar Qaratereń boyında dawam etti

Respublikamızda ótkerilip atırǵan «Oraylıq Aziya pedagogları - bir region, bir dawıs, bir kúsh!» xalıqaralıq forumı qatnasıwshıları Taxtakópir rayonına bardı. 

Dáslep, forum qatnasıwshıları «Bórshitaw» tawınıń tóbesinde shólkemlestirilgen «Etno awılı»na barıp, bul jerde áyyemgi xalqımızdıń bay mádeniy turmıs tárizi hám milliy arxitekturalıq usılda jaratılǵan shańaraqlar, milliy kiyimleri hám olar paydalanǵan úy ánjamları menen jaqınnan tanıstı.

Bunnan soń, forum qatnasıwshıları «Qaratereń» ekoturizm orayında jaratılǵan sharayatlar - milliy dástúrler tiykarında qurılǵan qara úyler, haqıyqıy shól ortalıǵı hám tábiyǵıy kórinisleri menen tanıstı. 

Sonday-aq, qaraqalpaq xalqınıń bay mádeniyatı hám dástúriy kórkem óneri sáwlelengen kórgizbeler, etnografiyalıq kórkem shıǵıwlar miymanlarda úlken tásir qaldırdı. Shólkemlestirilgen saxnalıq kórinisler arqalı miymanlar kóp milletli xalqımızdıń mádeniyatı hám qádiriyatların jaqınnan seziw imkaniyatına iye boldı.

Forumnıń ekinshi bóliminde pedagoglar ushın ámeliy oqıw-seminar ilajları shólkemlestirilip, onda bilimlendiriwde innovaciyalıq kózqaraslar, sanlı texnologiyalardan paydalanıw hám xalıqaralıq birge islesiwdi rawajlandırıwǵa baylanıslı máseleler dodalanadı.