Nókis suw tazalaw obekti paydalanıwǵa tapsırıldı

Nókis suw tazalaw obektiniń rekonstrukciyadan keyingi qayta paydalanıwǵa tapsırılıwı múnásibeti menen ashılıw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám «Wzsuvtaminot» jámiyeti basqarıwı baslıǵı Axmad Suvankulov shıǵıp sóylep, jıynalǵanlardı qutlıqladı. 

Atap ótiw orınlı, aldın «Nѳkis suw tazalaw» obektinde ulıwma quwatlıǵı boyınsha sutkasına 60 mıń kub metr suw jetkerip beriw imkaniyatı bar bolǵan bolsa, Prezidentimizdiń arnawlı qararı menen 86,6 mlrd. sum qarjı tiykarında rekonstrukciya jumısları alıp barılıp, bul kórsetkish 90 mıń kub metrge jetkerildi. Xalıqtı taza ishimlik suwı menen qamtıp alıw bolsa, 279 mıńnan 340 mıńnan aslam puqaraǵa jetkerildi.

Bunnan tısqarı, Nókis qalası, Taqıyatas hám Xojeli rayonlarında “Jáhán banki”niń 78 mln. dollarlıq qarjıları esabınan 286 kilometr kanalizaciya tarmaqları hám obektlerinde qurılıs jumısları baslanbaqta. Sonday-aq, Ámiwdárya, Beruniy, Qaraózek, Qońırat, Moynaq hám Nókis rayonlarında Aziya rawajlanıw bankiniń 145 mln. dollarlıq qarjıları esabınan ishimlik suw támiynatın jaqsılaw jumısları dawam ettirilmekte.

Búgingi saltanatlı iláj dawamında «Wzsuvtaminot» jámiyeti tárepinen suw tazalaw obekti hám aqaba suw tarmaqları kárxanalarına arnawlı avtotransport quralları tapsırıldı.

Iláj qatnasıwshıları ámelge asırılǵan jumıslar menen jaqınnan tanıstı.