Saida Mirziyoeva ETRB prezidenti menen Qaraqalpaqstandaǵı joybarlardı qollap-quwatlaw máselelerin dodaladı

Prezident Administraciyasınıń Baslıǵı Saida Mirziyoeva Londonda ETRB prezidenti Odil Renaud-Basso menen hayal-qızlar hám jaslardı qollap-quwatlaw, irrigaciya, "jasıl" ekonomika, Qaraqalpaqstandı rawajlandırıw sıyaqlı tarawlardaǵı joybarlardı dodaladı.

Ciyshembi kúni Prezident Administraciyasınıń Baslıǵı Saida Mirziyoeva Londonda Evropa tikleniw hám rawajlanıw banki prezidenti Odil Reno-Basso menen ushırastı.

Prezident Administraciyasınıń Baslıǵı Ózbekstan shólkem tárepinen "mámlekettegi kóplegen hayal-qızlar hám jaslardıń turmısın unamlı tárepke ózgertip atırǵan" Women in Business (Isbilermen hayal-qızlar) hám Youth bin Business (Isbilermen jaslar) baǵdarlamaları qollap-quwatlanıp atırǵanın joqarı qádirleytuǵının atap ótti.

Sonday-aq, ol Ózbekstan hám ETRB arasındaǵı birge islesiwdiń Qaraqalpaqstanda aymaqtıń turaqlı rawajlanıwına qaratılǵan joybarların, sonday-aq, irrigaciya hám "jasıl" ekonomika tarawlarında keń kólemli infrastrukturalıq joybarlardı ámelge asırıw baǵdarındaǵı birge islesiwi joqarı ekenin ayrıqsha atap ótti.

"Ushırasıwda Oraylıq Aziya mámleketleriniń jaqsı qońsıshılıq baǵdarındaǵı ulıwma háreketleri sebepli regionda isenim hám birge islesiw ortalıǵı qálipleskeni haqqında birdey pikir bildirildi", - delinedi postta.

Sonday-aq, Londonda "Jańa Ózbekstan - úlken imkaniyatlarǵa iye úlken mámleket" atamasında dógerek sáwbeti bolıp ótti.

Onda shıǵıp sóylegen Saida Mirziyoeva Ózbekstanda 270 ten aslam Britaniya kompaniyası jumıs alıp barıp atırǵanın atap ótti. Ol britaniyalı birge islesiwshilerdiń Ózbekstan ekonomikasındaǵı qatnası keńeyiwine úmit bildirdi.