Bozataw sanatoriyası paydalanıwǵa tapsırıldı

Usı jıldıń 17-oktyabr kúni húrmetli Prezidentimiz Shavkat Mirziyoevtiń Ózbekstan kásiplik awqamları belsendileri hám nuranıyları menen ushırasıwı ótkerildi. 

Onda Bozataw rayonınan Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Prezidentiniń keńesgóyi T.Xudaybergenov, Ministrler Keńesiniń Baslıǵı F.Ermanov, keń jámiyetshilik wákilleri videobaylanıs arqalı qatnastı. 

Ótkerilgen ushırasıw sheńberinde alıs Bozataw rayonında Prezidentimizdiń tapsırması menen Ózbekstan kásiplik awqamları Federaciyası tárepinen 123 mlrd. sum muǵdarında qarjılandırılıp, jańadan qurılǵan Bozataw sanatoriyasınıń ashılıw saltanatı ótkerildi.

Onda Joqarǵı Keńes Baslıǵı shıǵıp sóylep, sońǵı jılları xalqımızdıń abadan turmısın támiyinlew, olarǵa qolaylı sharayatlar jaratıw, salamatlıǵın bekkemlew baǵdarında ámelge asırılıp atırǵan keń kólemli jumıslarǵa toqtalıp, álbette, bunday jańalanıwlardı óz turmısında sezinip atırǵan puqaralarımız bunnan sheksiz minnetdar ekenligin atap ótti. 

Atap ótiw orınlı, altı etajlı, 200 orınǵa mólsherlengen jańa, zamanagóy sanatoriyada 100 den aslam jańa jumıs orınları jaratılıp, jergilikli puqaralardıń bántligi támiyinlendi. Álbette, bul orın xalqımızdıń salamatlıǵın tiklew hám bekkemlew jolında uzaq jıllar dawamında xızmet etedi.