Prezident Shavkat Mirziyoevtiń Ózbekstan kásiplik awqamlarınıń belsendileri hám veteranları menen ushırasıwdaǵı shıǵıp sóylegen sózi
Assalawma áleykum, qádirli doslar, húrmetli miymanlar!
Húrmetli kásiplik awqamları veteranları hám belsendileri!
Sizler menen mine usınday qızǵın, kóterińki keypiyatta kórisip turǵanımnan quwanıshlıman.
Bársheńizge, kásiplik awqamlarınıń kóp millionlı aǵzalarına ózimniń joqarı húrmetim hám jaqsı tileklerimdi bildiremen.
Biz búgingi kúnde óz aldımızǵa úlken shekler qoyıp, Jańa Ózbekstandı qurıw jolınan alǵa qaray isenimli qádem taslap atırmız.
Dúnyada geosiyasiy hám ekonomikalıq keskinlik háwij alıp atırǵan házirgi qıyın dáwirde elimizde tınıshlıqtı bekkemlep, kóp milletli xalqımızdıń turmısın jáne de jaqsılawǵa bekkem bel baylaǵanbız.
Bular, álbette, óz-ózinen bolıp atırǵan joq.
Qanshelli qıyın bolmasın, birgelikte qattı miynet etip, hár qıylı sınaq hám mashaqatlardan múnásip tárizde ótip barmaqtamız. Bul baǵdarda miynetkesh hám keńpeyil xalqımız, hár bir watanlasımızdıń ornı, qosıp atırǵan úlesi sheksiz, álbette.
Búgingi dógeregimizde óz ómirin insan miynetin, onıń nızamlı máplerin qorǵawday iygilikli iske baǵıshlaǵan, tarawda uzaq jıllar nátiyjeli xızmet etip, húrmet hám itibar tapqan kóplegen adamlardı kórip turman.
Insan miyneti, onıń qádir-qımbatı qanday biybaha baylıq ekenin sizler hámmeden jaqsı bilesiz.
Elimizde xalıqshıl, sociallıq mámleket qurıw, insan qádirin ulıǵlaw barlıq reformalarımızdıń bas maqsetine aylanǵan házirgi kúnde siz, ázizlerdiń bay bilim hám tájiriybeńiz biz ushın oǵada áhmiyetli.
Pursattan paydalanıp, hár bir kárxana hám shólkemge – issheńlik ortalıǵın, miynet jámáátlerine – xoshamet hám ádillik ruwxın alıp kirip atırǵan kásiplik awqamlarınıń belsendilerine shın kewilden minnetdarshılıq bildiremen.
Áziz doslar!
Ullı aǵartıwshı babamız Mahmudxwja Behbudiy: “Biz óz turmısımızdı ózgertpekshi bolsaq, bárinen burın, adamlardıń huqıqın tán alıwdı úyreniwimiz kerek”, degen edi.
Bul – haq gáp. Haqıyqatında da, huqıq hám erkinlikler támiyinlengen, adamları emin-erkin jasap, miynet etip, dáramat tabatuǵın elde mámleket te, jámiyet te álbette rawajlanadı. Sonlıqtan, biz reformalardı baslaǵan dáslepki kúnlerden-aq “Insan qádiri ushın” degen iygilikli ideyanı ámelge asırıw ushın, bárinen burın, ekonomikalıq-sociallıq tarawlardı rawajlandırıwdı tiykarǵı wazıypa sıpatında belgilep aldıq.
Bul joldaǵı háreketlerimiz sebepli segiz jılda ekonomikamızǵa 130 milliard dollar investiciya kirip keldi, mıńlaǵan jańa quwatlıqlar iske qosıldı, millionlaǵan turaqlı jumıs orınları jaratıldı.
Jeke menshik sektorǵa keńnen jol ashıp, shın júrekten isleymen degen adamlarǵa múnásip miynet sharayatın jaratıp bergenimiz ushın jan basına dáramat 3,5 mıń dollarǵa jetti.
Hár bir insannıń huqıq hám erkinligin támiyinlew, miynetin qorǵaw, kepillengen sociallıq qorǵawdan paydalanıwı ushın bekkem nızamlı tiykarlar jarattıq. Ásirese, jańalanǵan Konstituciyamız, jańa redakciyadaǵı Miynet kodeksi, “Xalıqtıń bántligi haqqında”ǵı, “Kásiplik awqamları haqqında”ǵı nızamlardıń qabıl etilgeni bul baǵdardaǵı áhmiyetli qádemler boldı.
Parlamentimiz janındaǵı Jámiyetlik ekspert keńesleriniń quramına kásiplik awqamlarınıń wákilleri de kirgizildi. Bul bolsa nızamlardı qabıl etiwde xızmetkerlerdiń mápi jáne de isenimli qorǵalıwına xızmet etpekte.
Jańa Ózbekstanda erkin hám kúshli puqaralıq jámiyetin qáliplestiriw de biz ushın jetekshi baǵdar bolıp qalmaqta. Sociallıq institutlardı qollap-quwatlaw kólemi 2017-jılǵa salıstırǵanda 100 esege artıp, bıyıl 1 trillion 200 milliard sumǵa jetti.
Sonıń menen birge, puqaralıq jámiyeti institutlarınıń jumısına aralasqanı, jámiyetlik qadaǵalaw nátiyjelerin kórip shıqpaǵanı ushın juwapkershilik belgilendi.
Bir sóz benen aytqanda, milliy huqıq sistemamız xalıqaralıq standartlarǵa beyimlesip, insan huqıqları, puqaralıq jámiyeti institutlarınıń jumısınıń turaqlı kepilligine aylandı.
Ózbekstan Xalıqaralıq miynet shólkeminiń standartların qabıl etip atırǵan eń belsendi mámleketler qatarınan orın alıp atırǵanı dúnya jámiyetshiligi tárepinen de tán alınıp atırǵanın atap ótiw kerek. Itibar beriń, segiz jıl aldın bul shólkemniń Ózbekstan tárepinen ratifikaciyalanǵan hújjetleriniń sanı 12 bolǵan bolsa, házirgi kúnde 25 ke jetti.
Hár bir ratifikaciya arqalı Ózbekstan ózine úlken minnetleme almaqta.
Ne ushın hesh ekilenbesten ózimizge bunday úlken juwapkershilikti alıp atırmız?
Sebebi, barlıq reformalarımız tiykarında insan qádirin ulıǵlaw jámlengen. Bul – mámleketimiz qosılıp atırǵan xalıqaralıq hújjetlerdiń mazmunı menen tolıq únles bolıp esaplanadı.
Áyne insan qádirine itibar – barlıq tabıslarımızdıń tiykarı, desek, haqıyqattı aytqan bolamız!
Qádirli doslar!
Bir eslep kóriń, balalar miyneti hám májbúriy miynetti tolıq saplastırıw uzaq jıllar biz ushın eń awır másele bolıp kelgen edi. Tek ǵana kúshli erk-ıqrar, qatań poziciyamız arqalı biz bul qıyın mashqalanı unamlı sheshtik.
Jańa Ózbekstannıń insanıylıq principlerine sadıqlıǵın kórsetetuǵın bul ózgeris sociallıq turmısımızda pútkilley jańa bet ashpaqta. Mámleketimizdiń balalar miyneti hám májbúriy miynetti saplastırıw boyınsha aldınǵı tájiriybesi Xalıqaralıq miynet shólkemi tárepinen úlgi sıpatında basqa mámleketlerge usınıs etilgeni de sonnan derek beredi.
Ózbek paxtası dúnyadaǵı kóplegen abıraylı brend kompaniyalardıń “qara dizimi”nen shıǵarıldı. Cotton campaign shólkemi Ózbekstanǵa qoyılǵan qadaǵan etiwdi pútkilley biykarladı. Evropa Awqamı Ózbekstanǵa bul siyasiy struktura mámleketleri bazarına jeńilletilgen túrde kiriw imkaniyatın beretuǵın GSP+ sistemasın usındı. Milliy ónimlerimiz ushın 26 jańa bazar ashıldı, Evropaǵa eksportımız 5 esege artıp, 1,5 milliard dollarǵa jetti.
Burın bunday sanlardı árman da ete almaytuǵın edik. Búgin bul jumıslar dawam etpekte. Máselen, kelesi háptede Evropa Awqamı menen Keńeytilgen birge islesiw hám sheriklik haqqındaǵı kelisimge qol qoyamız. Bul – sırtqı siyasat, qáwipsizlik, korrupciya, terrorizmge qarsı gúresiw hám basqa da tarawlarda birge islesiwdi bekkemlew menen birge, Evropa mámleketleri hám mámleketimiz arasında investiciyalıq hám sawda-ekonomikalıq baylanıslardı bunnan bılay da rawajlandırıwǵa xızmet etedi.
Erisip atırǵan jetiskenliklerimiz xalıqaralıq kólemde múnásip tán alınıp atırǵanı bárshemizge qanaatlanıwshılıq baǵıshlaydı.
Ózbekstan sanawlı mámleketler qatarında Birlesken Milletler Shólkeminiń “Ádil ótiw processleri ushın jumıs orınların jaratıw hám sociallıq qorǵaw boyınsha global akselerator” baslamasında qatnaspaqta; Xalıqaralıq miynet shólkeminiń “Sociallıq ádillik boyınsha global koaliciyası”nda qatnaspaqta; mámleketimiz ótken jılı usı shólkemniń Hákimshilik keńesi aǵzalıǵına saylandı.
Xalıqaralıq maydanda Watanımızǵa bolǵan húrmet hám isenim barǵan sayın artıp, dúnyanıń barlıq regionlarında doslarımız, sheriklerimiz kóbeymekte.
Bulardıń barlıǵı reformalarımızǵa úlken isenim hám tán alıwdıń kórinisi emes pe?
Pursattan paydalanıp, mine usı máseleler boyınsha biz benen tıǵız birge islesip kiyatırǵan Xalıqaralıq miynet shólkemi hám basqa da abıraylı strukturalarǵa minnetdarshılıq bildiremen.
Álbette, biz erisip atırǵan nátiyjelerde 8 millionǵa shamalas aǵzaǵa iye, eń xalıqshıl hám iri mámleketlik emes shólkem bolǵan kásiplik awqamlarınıń múnásip úlesi bar.
Biz Ózbekstanda kásiplik awqamlarınıń erkin jumıs alıp barıwı ushın barlıq sharayatlardı jaratıp berdik hám mine usı principlerge hámiyshe sadıqpız. Kásiplik awqamlarına birlesiw huqıqın támiyinlew, olardıń jumısına aralaspaw boyınsha siyasattı bunnan bılay da qatań dawam ettiremiz.
Usı jerde kásiplik awqamlarınıń kárxana hám shólkemlerde miynetke baylanıslı huqıqlardı qorǵawdaǵı jankúyerligi ayrıqsha itibarǵa ılayıq. Bunı keyingi jılları 500 mıńǵa shamalas xızmetkerdiń nızamlı huqıqları qorǵalıp, olardıń paydasına 267 milliard sum óndirip berilgeni de tastıyıqlaydı. Sonday-aq, jumıstaǵı baxıtsız hádiyseler sebepli jábirlengen 1 mıń xızmetkerge 35 milliard sum kompensaciya pulı tólep berilgen. Bunnan tısqarı, nahaqtan bosatılǵan 13 mıń xızmetker jumısqa tiklengen.
Tórt jıl aldın sizlerdiń baslamańız benen birinshi márte Miynet hám sociallıq qatnasıqlar akademiyasın shólkemlestirdik. Bul kásiplik awqamları jumısında jańa baǵdar boldı.
Joqarı oqıw ornı pitkeriwshileri kárxana hám shólkemlerde miynet huqıqlarınıń qorǵawshısına aylanıp, bul tarawda nızamlılıqtı bekkemlewge múnásip úles qosatuǵınına isenemen.
Ulıwma, kásiplik awqamları jumısınıń jańa qırları tek ǵana elimizde emes, al xalıqaralıq kólemde de olardıń ornı hám abırayınıń artıp barıwına xızmet etpekte. Federaciyanıń baslaması menen 2021-jılı Tashkent qalasında Oraylıq Aziya mámleketleri kásiplik awqamları keńesi dúzildi. 2023-jılı Samarqand qalasında Túrkiy mámleketler kásiplik awqamları shólkemine tiykar salındı.
Federaciyamız ótken jılı Xalıqaralıq kásiplik awqamları konfederaciyasına aǵza bolǵanı onıń dúnyadaǵı abırayın jańa basqıshqa alıp shıǵatuǵın tariyxıy waqıya boldı. Federaciyanıń sociallıq qorǵaw, gender teńlikti támiyinlew, xızmetkerler hám olardıń shańaraq aǵzaların salamatlandırıw, mádeniyat hám sporttı rawajlandırıw baǵdarındaǵı háreketlerin de tolıq qollap-quwatlaymız.
Húrmetli májilis qatnasıwshıları!
Jańa Ózbekstanda hár bir insanǵa múnásip miynet, kásip tarawında ósiw, dem alıw hám salamatlıǵın tiklew ushın zárúr sharayat jaratıw – oǵada áhmiyetli másele.
Biz usı maqsette sociallıq mámlekettiń jańa modelin jaratıp atırmız. “Kúshli kásiplik awqamları – kúshli jámiyet tiykarı” degen baslama tiykarında sizler bul processte aldınǵı qatarda bolıwıńız kerek.
Endi, sizler menen kásiplik awqamlarınıń jumısın bunnan bılay da rawajlandırıw hám miynet qatnasıqların jaqsılaw boyınsha keleshektegi wazıypalardı belgilep alsaq, ne deysizler?
Birinshiden, adamlardıń óz miynetinen mápdarlıǵı qansha artsa, reformalardıń nátiyjeliligi de sonsha joqarı boladı.
Jaqsı bilesiz, 2023-jıldan birinshi márte minimal tutınıw qárejetlerin islep shıǵıp, ámeliyatqa engizdik. Jańalanǵan Konstituciyamızda pensiya, napaqa hám sociallıq járdemlerdiń muǵdarı eń kem tutınıw qárejetlerinen az bolmawı qatań belgilep qoyıldı.
Ekonomikamız turaqlı ósip barmaqta. Xalqımızdıń turmıs abadanlıǵın soǵan sáykes túrde arttırıw ushın miynetke haqı tólewdiń eń az muǵdarın da hár jılı kóbeytip barmaqtamız.
Biraq, ashıq aytıw kerek, bul máseleler kóbinese bir tárepleme, yaǵnıy, mámleketlik uyımlardıń esap-sanaǵı hám usınısı menen sheshilmekte. Sonlıqtan, kelesi jıldan miynetke haqı tólewdiń eń az muǵdarına baylanıslı nızamshılıq hújjetleriniń joybarın islep shıǵıwǵa Sociallıq-miynet máseleleri boyınsha úsh tárepleme respublikalıq komissiyanı da (Kásiplik awqamları federaciyası, Bántlik ministrligi, Jumıs beriwshiler konfederaciyası) tartsaq, bul oǵada durıs boladı, dep oylayman.
Bul – miynetke haqı tólewdiń eń az muǵdarın belgilewde xızmetkerlerdiń mápin kepillikli qorǵaw boyınsha jańasha qatnas boladı.
Usı jerde bir haqıyqattı jaqsı túsinip alıwımız kerek: insan qádiri, onıń turmıs sapası tek ǵana miynet haqı menen emes, al sociallıq ortalıq penen de belgilenedi. Bunıń ushın xızmetkerlerdi turaq jay, sapalı bilimlendiriw, medicina hám transport xızmetleri menen kepillikli támiyinlep, eń áhmiyetli turmıslıq zárúrliklerine jetetuǵın dáramat tabıwına sharayat jaratıp beriwimiz zárúr.
Bir sóz benen aytqanda, hár bir jumısshı, hár bir shańaraq óz turmısında sapa dárejesin seziwi, mámleket hám jámiyet bolsa onı kepillewi zárúr.
Kásiplik awqamları bul jumıslarda belsene qatnasadı, dep isenemen.
Ekinshiden, globallasıw hám sanlı rawajlanıw sharayatında miynet qatnasıqları tarawında jańa túrler de keńnen en jaymaqta.
Imkaniyat hám sharayat jaratıp bergenimiz sebepli búgingi kúnde 6 millionǵa shamalas xalıq ózin-ózi bánt etip, ruwzıgershiligin támiyinlemekte. Máselen, házirgi waqıtta adamlarımız IT programmist, veb-dizayner, ónerment, taksi aydawshısı, kurer sıyaqlı onlaǵan kásiplerde platformalı bántlik tiykarında islemekte. Kóplegen puqaralarımız, ásirese, hayal-qızlar aralıqtan turıp miynet etiwdi úyrendi.
Bunnan tısqarı, biz máhálle institutın túp-tiykarınan reformalap, barlıq dárejedegi basshılar eń tómengi buwınǵa túsip isleytuǵın xalıqshıl sistema jarattıq.
Máhállelerdi drayver tarawlarǵa qánigelestiriw esabınan 1,5 million shańaraq óz shańaraǵında islep, dáramat almaqta.
Búgin bul baǵdarlar ekonomikalıq rawajlanıwımızdıń bir bólegine, olarda jumıs alıp barıp atırǵan adamlar bolsa miynet qatnasıqlarınıń teń huqıqlı subektine aylanbaqta.
Endi, Kásiplik awqamları da máhálleler menen jaqınnan isleytuǵın nátiyjeli sistemanı jolǵa qoysa, durıs boladı, dep oylayman.
Bántlik ministrligi (B.Zohidov) de kásiplik awqamları menen birge platformalarda jumıs alıp barıp atırǵan adamlarımızdıń miynet huqıqların qorǵaw hám miynettiń qorǵalıwın támiyinlew; olardıń ómiri, qáwipsizligin qamsızlandırıw boyınsha tiykarlanǵan usınıslardı Húkimetke kirgizse, maqsetke muwapıq bolar edi.
Úshinshiden, kásiplik awqamları ótken dáwirde hayal-qızlar miynetin qorǵaw boyınsha úlken tájiriybe topladı.
Atap aytqanda, olar “Hayal-qızlar dápteri” arqalı 4,5 million járdemge mútáj, kem támiyinlengen apa-qarındaslarımızǵa járdem kórsetiwde bas-qas boldı.
Hayal-qızlardıń belsendi sociallıq qatlam bolıp qáliplesiwinde kásiplik awqamların jetekshi kúshke aylandırıw ushın búgin barlıq imkaniyatlar bar. Bul baǵdarda “Kásiplik awqamları – hayal-qızlar mápi jolında” degen súren tiykarında jańa sistemanı jolǵa qoyıwdı usınıs etemen.
Usı sistema sheńberinde Hayal-qızlardı sociallıq-ekonomikalıq qollap-quwatlaw boyınsha komissiya hám Federaciya miynet bazarında hayal-qızlar ushın teńdey imkaniyatlar jaratıw, olardıń turmısta óz ornın tabıwına hám sociallıq belsendiligin arttırıwǵa járdemlesiw boyınsha jańa qatnaslardı engizse; turaq jay hám jasaw sharayatın jaqsılawǵa, medicinalıq, psixologiyalıq, huqıqıy járdemge mútáj, kúsh kórsetiw hám zorlıqqa ushıraǵan hayal-qızlardı da “Hayal-qızlar dápteri” arqalı qollap-quwatlawdı jolǵa qoysa; awıllıq jerlerde hayal-qızlardıń bántligin hám isbilermenligin qollap-quwatlaw baǵdarlamaların jáne de keńeytse; hár jılı miynet jámáátlerindegi gender audit nátiyjelerin dodalap, jumıs beriwshiler menen birge 14 tarmaq kásiplik awqamları boyınsha gender teńlikti támiyinlew ushın mánzilli strategiyalar islep shıǵıw ilajların kórip barsa, húrmetli hayal-qızlarımız quwanıshlı boladı, dep oylayman.
Tórtinshiden, kásiplik awqamları – miynetti qorǵaw boyınsha jámiyetlik qadaǵalawdı alıp baratuǵın eń úlken shólkem.
Keyingi bes jılda olar tárepinen kárxana hám shólkemlerde 152 mıń nızam buzılıwı anıqlanǵan. Negizinde bunday jaǵdaylar bir qansha kóp.
Mısal ushın, sudlar tárepinen úsh jılda 48 mıńnan aslam miynet kelispewshilikleri kórip shıǵılǵan. Kásiplik awqamları jarastırıwshı, kelisim beriwshi buwın sıpatında jumıs beriwshi hám xızmetker arasındaǵı kelispewshiliklerdi sudqa shekem sheshiwde belsendilik kórsetse, maqsetke muwapıq boladı.
Sonıń menen birge, jumıs penen baylanıslı baxıtsız hádiyseler hám kásipke baylanıslı kesellikler haqqındaǵı maǵlıwmatlardıń bir pútin sisteması joq. Máselen, baxıtsız hádiyseler esabı hám olardıń sebebin úyreniw otız jıl aldın qabıl etilgen húkimet qararındaǵı eskirgen normalar tiykarında qaǵazda júrgizilmekte.
Búgin, barlıq tarawlar sanlastırılıp atırǵan bir waqıtta jasalma intellektti engizip, bunday jaǵdaylardı jedellik penen anıqlaw kerek ekenligin sizler, álbette, jaqsı túsinesiz.
Bántlik ministri B.Zohidov, densawlıqtı saqlaw ministri A.Xudayarov, sanlı texnologiyalar ministri Sh.Shermatov Kásiplik awqamları menen birgelikte eki ay múddette baxıtsız hádiyse hám kásipke baylanıslı keselliklerge shatılıw jaǵdayları haqqındaǵı maǵlıwmatlardı alıwdıń birden-bir sistemasın iske qossın; bunday hádiyselerdiń esabın júrgiziw, sebeplerin tallaw hám olarǵa sheshim tabıw boyınsha qarar joybarın kirgizsin.
Besinshiden, házirgi waqıtta Federaciya quramında 14 tarmaq kásiplik awqamı jumıs alıp barmaqta.
Tilekke qarsı, tiyisli tarmaqlarda miynet etip atırǵan xızmetkerlerdiń huqıqların isenimli támiyinleytuǵın baslamalardı alǵa qoyıwda olardıń dawısı esitilip atırǵan joq.
Kórip tursızlar, ekonomikamızǵa jańadan-jańa taraw hám baǵdarlar, soǵan sáykes túrde jańa kásipler, zamanagóy texnologiyalar jedel kirip kelmekte. Mine, usınday sharayatta tarmaq kásiplik awqamları ministrlikler hám uyımlar menen birge islesip, olardıń aldına anıq wazıypalar qoyıp barıwı kerek emes pe?
Sonıń ushın, ministrlikler hám uyımlar jáne tarmaq kásiplik awqamları kollegial uyımlarınıń birgeliktegi májilisin turaqlı túrde ótkerip baratuǵın sistemanı jolǵa qoyıwdı usınıs etemen.
Bunday qarım-qatnas túri “mámleket – jumıs beriwshiler – miynet jámáátleri” arasındaǵı óz-ara isenim hám birge islesiwdi bekkemlep, nátiyjeli mexanizmge aylanatuǵınına isenemen.
Altınshıdan, Xalıqaralıq miynet shólkemi menen birgelikte Ózbekstanda múnásip miynet boyınsha 2030-jılǵa shekem mólsherlengen baǵdarlama islep shıǵılmaqta.
Bunnan gózlengen tiykarǵı maqset – miynet tarawında insan qádirin arttırıw, barlıq puqaralar ushın ádalatlı hám qáwipsiz miynet sharayatların jaratıwdan ibarat.
Sonlıqtan Kásiplik awqamları, Bántlik ministrligi, Jumıs beriwshiler konfederaciyası baǵdarlamada múnásip bántlik, miynetti qorǵaw, sociallıq qamsızlandırıw, gender teńlik, jaslar hám inklyuzivlik máselelerine ayrıqsha itibar qaratıwı zárúr, dep esaplayman.
Bunnan tısqarı, sanlastırıw, jasalma intellekt hám “jasıl” ekonomika jedel rawajlanıp atırǵan sharayatta miynet qatnasıqları da soǵan sáykes túrde jolǵa qoyılıwı kerek.
Islep shıǵılıp atırǵan “Múnásip miynet” baǵdarlaması jedel ósip baratırǵan ekonomikamızdı sociallıq ádillik penen úylestiretuǵın strategiyalıq “jol kartası” boladı.
Jetinshiden, hár qıylı sebepler menen jumıssız qalǵan, miynet etiw procesinde kesellik yamasa mayıplıqqa ushıraǵan adamlardı sociallıq qollap-quwatlaw kepilliklerin kúsheytiw de áhmiyetli wazıypa bolıp tabıladı.
Sol sebepli, tikkeley ámel etetuǵın “Mámleketlik sociallıq qamsızlandırıw haqqında”ǵı nızamnıń qabıl etiliwin tezlestirip, onda sociallıq qamsızlandırıw qorın qáliplestiriwde jumıs beriwshi hám xızmetkerlerdiń qatnasıwın anıq belgilep bersek, ádillikten boladı, dep oylayman.
Jáne bir másele – málimleme kommunikaciyaları jedel rawajlanıp atırǵan házirgi dáwirde adamlarǵa isenimli maǵlıwmatlardı óz waqtında, durıs jetkeriw oǵada áhmiyetli.
Kásiplik awqamlarında bunıń ushın imkaniyat ta, sharayat ta, potencial da jeterli.
Eń úlken auditoriyaǵa iye bolǵan kásiplik awqamları hadal hám pidayı miynetti úgit-násiyatlaw hám miynet qatnasıqlarında nızamlılıqtı támiyinlewge baylanıslı málimlemelerdi jámiyetshilikke birinshilerden bolıp jetkeriwi kerek.
Qádirli miymanlar!
Kásiplik awqamları sistemasındaǵı 30 dan aslam sanatoriy hám 100 den aslam balalar dem alıw orayları xızmetkerler hám olardıń perzentleriniń salamatlıǵın tiklep, dem alıwı ushın xızmet etpekte.
Sońǵı bes jılda sanatoriylerde 900 mıńǵa shamalas xalıq óz salamatlıǵın tikledi, dem alıw oraylarında bolsa 800 mıń bala dem aldı.
Jaqında Íssıqkólde “Bostan Rezort” pansionatınıń iske qosılǵanı watanlaslarımız ushın jáne bir qolaylıq boldı. Sonıń menen birge, bul Ózbekstan hám Qırǵızstan qatnasıqlarınıń bekkemlenip atırǵanınıń simvolına aylandı.
Házirgi waqıtta kásiplik awqamları infrastrukturası xalqımızdıń talapların tolıq qamtıp almay atır, desek, bul da haqıyqat boladı.
Bul máselede hákimler de shette qalmawı kerek. Olar hár jılı óz aymaǵında kásiplik awqamları menen birgelikte yamasa mámleketlik-jeke menshik sheriklik járdeminde zamanagóy joybarlar tiykarında birewden sanatoriy hám dem alıw ornın qurıw boyınsha óz aldına baǵdarlama tastıyıqlasa, durıs boladı, dep oylayman.
Áziz doslar!
Turmıs bir haqıyqattı bárqulla atap ótedi: tariyxtı puqta bilmesten turıp, keleshekti qurıp bolmaydı. Sonıń ushın, hár bir shólkem hám mákeme tariyxın úyreniw, olarda miynet etken insanlardı eslew, iygilikli islerin keleshek áwladlarǵa jetkeriw bárshemizdiń minnetimiz.
Usı maqsette ilimpazlarımız, taraw veteranları hám belsendileri tárepinen ótkerilgen úyreniwler elimizde kásiplik awqamları háreketine 1905-jılı tiykar salınǵanın dálilledi.
Bunnan tórt jıl burın Tashkent qalasında shólkemlestirilgen Ózbekstan kásiplik awqamları Federaciyası tariyxı muzeyi tarawǵa baylanıslı maǵlıwmat hám eksponatlar menen xalqımızdı tanıstırıwda áhmiyetli rol atqarmaqta.
Sonlıqtan, bıyıl pútkil mámleketimiz boylap kásiplik awqamları háreketiniń 120 jıllıq yubileyi keńnen belgilenbekte. Mine usı qutlı sáne múnásibeti menen miynetkesh xalqımızǵa tereń húrmet belgisi sıpatında hár bir aymaqta “Kásiplik awqamları baǵları”n shólkemlestiriwdi usınıs etemen.
Házir tapsırma beremen, wálayat hákimleri sizler menen másláhátlesip, eki hápte ishinde ornın ajıratıp beredi. Kásiplik awqamları federaciyası – Tashkent qalasında, 14 tarmaqlıq kásiplik awqamları – wálayat oraylarında bul baǵlardı shólkemlestiriwge ózleri bas-qas bolıp, olardı sulıw mákanǵa aylandırsa, bul da miynet súygishliktiń simvollıq belgisi bolıp xızmet etedi.
Kárxana hám shólkemlerdegi kásiplik awqamları da jumıs ornında, xızmetkerleri jasaytuǵın máhállelerde terek egip, jasıl aymaqlardı keńeytip, tazalıq hám abadanlastırıw jumısların shólkemlestirse, miynet jámáátlerindegi ortalıq pútkilley basqasha boladı, dep oylayman.
Húrmetli watanlaslar, qádirli doslar!
Búgingi sóylesiwimizde bildirilgen usınıs hám baslamalar tarawdıń rawajlanıwı ushın paydalı boldı, dep oylayman.
Birgelikte baslaǵan jumıslarımız hár bir miynet jámááti, hár bir xızmetker hám onıń shańaraǵı ushın paydalı bolıp atırǵanına jáne bir márte isendim.
“Insan qádiri ushın,” degen iygilikli ideya bunnan bılay da Jańa Ózbekstandaǵı reformalardıń tiykarǵı baǵdarlarınan biri bolıp qaladı.
Pursattan paydalanıp, siz, ázizlerdi Ózbekstan kásiplik awqamlarınıń 120 jıllıq yubileyi hám jaqınlasıp kiyatırǵan Kásiplik awqamları kúni menen qızǵın qutlıqlayman.
Bársheńizge bekkem densawlıq, juwapkershilikli hám maqtanıshlı jumısıńızda tabıs hám áwmetler, shańaraqlarıńızǵa baxıt-ıǵbal, qut-bereket tileymen.
El-jurtımız hámiyshe tınısh hám abat bolsın!