"Muftiy sıylıǵı - 2025" jarısınıń tolıq jeńimpazı - Qaraqalpaqstan komandası!

"Muftiy sıylıǵı - 2025" mini-futbol jarısınıń final oyını bolıp ótti.

Juwmaqlawshı ushırasıwda Namangan wákilligi hám Qaraqalpaqstan musılmanları qazıyatı komandaları óz-ara bellesti. Eki komanda da bul jarısqa ayrıqsha tayarlıq kórip kelgenligi ayqın kórindi. Sebebi olardıń saylap alıw basqıshınan tabıslı ótip, joqarı basqıshqa jetip kelgeni de biykarǵa emes.

Jarıs juwmaǵı boyınsha:

1-orın: Qaraqalpaqstan musılmanları qazıyatı jámááti;
2-orın: Namangan wákilligi komandası;
3-orın: Samarqand wákilligi komandasına nesip etti.

Qızǵın ótken oyındı futbol ıqlasbentleri qol shappatlawlar menen baqlap bardı. Tiykarǵı waqıtta komandalar 4:4 esabında teńbe-teń esapqa iye boldı. Jeńimpaz komanda penaltiler seriyası arqalı anıqlandı. Onda Qaraqalpaqstan musılmanları qazıyatı komandası 4:2 esabında tolıq jeńimpaz boldı.

Jarıstan soń sıylıqlaw máresimi bolıp ótti. Onda Ózbekstan musılmanları mákemesiniń baslıǵı, muftiy Shayx Nuriddin Xoliqnazar háziretleri, Din isleri boyınsha komitet baslıǵı Sodiqjon Toshboev, Ózbekstan futbol associaciyasınıń birinshi vice-prezidenti Ravshan Ermatov, Ózbekstan milliy saylandı komandasınıń járdemshi treneri Temur Kapadze, futbol ápsanası Mirjalol Qosimov hám bir topar juwapkerler bas kuboktı final oyını jeńimpazı Qaraqalpaqstan komandasına saltanatlı túrde tapsırdı. Sonday-aq, jeńimpaz komanda aǵzalarınıń hár birine birinshi orın medalı hám noutbuk tapsırıldı.

Sonday-aq, tóreshiler, "Eń jaqsı dárwazaman", "Eń kóp top urıwshı", "Eń jaqsı oyınshı" nominaciyalarına miyasar bolǵan oyınshılarǵa da bahalı sawǵalar, sonday-aq, barlıq orın iyelerine aqshalay sıylıqlar hám estelik sawǵaları da tapsırıldı.