Germaniya mámleketinen kelgen delegaciya menen ushırasıw ótkerildi

Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov Germaniya Federativ Respublikası Bundestaginiń Awıl xojalıǵı hám azıq-awqat máseleleri boyınsha komitetiniń baslıǵı Hermann Ferber basshılıǵındaǵı delegaciya menen ushırasıw ótkerdi.

Ushırasıwda dáslep Ministrler Keńesiniń Baslıǵı búgingi kúnde húrmetli Prezidentimiz basshılıǵında Qaraqalpaqstannıń investiciyalıq tartımlılıǵın arttırıw, isbilermenlikti qollap-quwatlaw, sol qatarı awıl xojalıǵı tarawın rawajlandırıw baǵdarında ámelge asırılıp atırǵan jumıslar haqqında keń túrde atap ótti.

Onda sonday-aq, eki mámleket jetekshileri qollap-quwatlawındaǵı Ózbekstan-Germaniya arasındaǵı jolǵa qoyılǵan qatnasıqlar, bul baǵdarda regionımızda da ámelge asırılıp atırǵan jumıslarǵa ayrıqsha toqtalıp ótildi.

Bunnan tısqarı, Qaraqalpaqstanda agrar tarawdı rawajlandırıw boyınsha ámelge asırılıp atırǵan ilajlar, sonıń ishinde, fermer xojalıqları hám sharwashılıq penen shuǵıllanıwshı isbilermenlerdi, organik ónimler jetistiriw joybarların qollap-quwatlaw, perspektivalı joybarlar ústinde birge islesiw, Germaniyanıń aldınǵı tájiriybelerin keńnen en jaydırıw máseleleri talqılandı.

Óz náwbetinde miymanlar jıllı júzlilik penen kútip alǵanı ushın minnetdarshılıǵın bildirdi hám birge islesiwdi ele de keńeytiw, bar bolǵan múmkinshiliklerden nátiyjeli paydalanıw baǵdarında pikirlerin bildirdi.  

Ushırasıw juwmaǵında birge islesiwdi ele de keńeytiw baǵdarında respublika basshıları barqulla tayar ekenligi hám hár qanday usınıs qollap-quwatlanatuǵınlıǵı atap ótildi.