Húrmetli awıl xojalıǵı xızmetkerleri!

Sizlerdi búgingi miynet jeńisi – Qaraqalpaqstan Respublikasınıń paxta tapsırıw rejesiniń orınlanǵanı múnásibeti menen gúllán xalqımız atınan qızǵın qutlıqlaymız.

2025-jıldıń zúrááti ushın 80 mıń gektar egislik maydanlarına shigit egilip, 315 mıń 200 tonna zúráát jıynap alıw belgilengen edi. Miynetsúygish paxtakeshlerimizdiń pidákerli xızmetleri arqasında búgin bul shekke erisilip, reje 315 mıń 345 tonna etip tolıq orınlandı.

Bul nátiyjeni qolǵa kirgiziw jolında Ámiwdárya, Beruniy, Ellikqala, Taqıyatas rayonları birinshilerden bolıp óz rejesin orınladı. Bunnan soń, Nókis rayonı, Qońırat, Qanlıkól hám Qaraózek rayonları belgilengen shekti qolǵa kirgizdi. Taxtakópir, Shomanay hám Kegeyli rayonları paxtakeshleri de óziniń salmaqlı úlesin qostı.

Bıyılǵı zúráátti jıynap alıwda, respublikamızdıń barlıq fermerleri, diyqanları, klaster kárxanalar jámáátleri, suwshı-irrigatorlar, agronom-mexanizatorlar, tarawdıń barlıq buwındaǵı wákilleri menen birge miynetkesh xalqımız da awızbirshilik penen óz úlesin qosqanı kewillerge maqtanısh sezimlerin baǵıshlamaqta.

Sonıda ayrıqsha aytıwımız kerek, paxtadan mol qırman úyiwde húrmetli Prezidentimizdiń Qaraqalpaqstan ushın óz aldına qabıl etilgen, texnika alıwdaǵı bir qatar jeńilliklerdi beriwshi arnawlı 66-sanlı qararı tiykarında respublikamızǵa alıp kelingen 1 000 nan aslam jańa texnika hám agregatlardıń da úlesi salmaqlı boldı. Ásirese, paxta teriwdi mexanizaciyalastırıw baǵdarında áhmiyetli qádemlerdiń biri bolǵan 60 tan aslam paxta teriw mashinalarınıń alıp kelinip, atız maydanlarında xızmet etiwi zúráátti jıynap alıwda paxtakeshlerge ayrıqsha kúsh-jiger baǵıshladı desek aljaspaǵan bolamız.

Húrmetli taraw pidayıları!

Sizlerdi jáne bir márte paxtadan mol qırman úyiwdegi miynet jeńisińiz benen qızǵın qutlıqlaymız. Tabısıńız jıldan-jılǵa arta bersin!

Amanbay Orınbaev,
Qaraqalpaqstan Respublikası Joqarǵı Keńesiniń Baslıǵı