Ishki isler uyımları xızmetkerleri kúni múnásibeti menen bayram saltanatı ótkerildi

Búgin Berdaq atındaǵı Qaraqalpaq mámleketlik akademiyalıq muzıkalı teatrında «Ishki isler uyımları xızmetkerleri kúni» múnásibeti menen bayram saltanatı bolıp ótti.

Ótkerilgen ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, taraw pidayıların hám veteranların búgingi bayram múnásibeti menen qutlıqladı.

Bayram ilajında Ózbekstan Respublikası Prezidentiniń keńesgóyi T.Xudaybergenov, Ózbekstan Respublikası Bas prokurorınıń orınbasarı B.Valiev, Ministrler Keńesiniń Baslıǵı F.Ermanov qatnastı.
 
Aytıp ótiw kerek, sońǵı jılları elimizde Húrmetli Prezidentimizdiń basshılıǵında ishki isler uyımlarınıń jumıs nátiyjeliligin jáne de arttırıw, tarawdı insanıylıq hám xalıqshıl sistemaǵa aylandırıw, ashıq-aydınlıq ortalıǵın kúsheytiw, bul jolda ayanbay miynet etip atırǵan taraw xızmetkerlerin qollap-quwatlaw máselelerine mámleketlik dárejede itibar qaratılmaqta.

Taraw xızmetkerleri óz wazıypasın minsiz atqarıw jolında, xalqımızdıń tınısh-tatıw turmısın támiyinlew, jınayatshılıqqa hám huqıqbuzarlıqlarǵa qarsı gúresiw, jámiyetlik tártipti hám jol háreketi qáwipsizligin saqlaw, xalqımızdıń abadan turmısın támiyinlew sıyaqlı kóplegen baǵdarlar boyınsha iygilikli jumıslar alıp barıp atır.
  
Ótkerilgen bayram saltanatında Ózbekstan Respublikası Prezidentiniń arnawlı qararı menen sıylıqlanǵan taraw wákillerine húrmetli ataqlar tapsırıldı.
Sonday-aq, juwapkershilikli wazıypalardı atqarıp kiyatırǵan bir qatar taraw wákilleri hám veteranlar Joqarǵı Keńes Prezidiumı qararı tiykarında kókirek belgileri hám bahalı sawǵalar menen sıylıqlandı.

Bunnan tısqarı, Ózbekstan Respublikası Bas prokuraturası, Ózbekstan Respublikası Ishki isler ministrliginiń buyrıǵına tiykar bir topar qatardaǵı xızmetshilerge kókirek nıshan, múddetinen aldın arnawlı shenler, bahalı sawǵalar menen xoshametlendi.

Bayram saltanatı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.