Shomanay rayonında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shomanay rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı «Begjap» APJ aymaǵındaǵı jańadan qurılıp atırǵan «Omad Suld» tuzdı qayta islew kárxanasınıń qurılıs jumısların kózden ótkerildi. Jańa kárxana iske túsiwi ushın barlıq múmkinshiliklerdi iske salıw boyınsha tapsırmalar berilip, anıq wazıypalar belgilendi.

Bunnan soń «Madeniyat» MPJ aymaǵındaǵı Drayver 24/7 joybarı tiykarında islenip atırǵan jaslar parkiniń qurılıs jumısları menen tanıstı. Bul jerde jaslar ushın mádeniy dem alıw hám sawda orınları, baylam ilajları hám koncert baǵdarlamaların ótkeriw ushın ashıq aspan astındaǵı arnawlı maydansha shólkemlestirilmekte.

Sonday-aq, húrmetli Prezidentimizdiń 404-sanlı qararı menen 9,4 mlrd. sum qarjı tiykarında jańadan qurılǵan rayonlıq medicina bólimine qaraslı kóp tarmaqlı poliklinikada jaratılǵan sharayatlar, sonıń menen bir qatarda ishki jap-salmalardı betonlaw jumısları kózden ótkerildi. 

Rayon orayında shólkemlestirilgen ónermentler sawda ornı jumısları da barıp kórildi. Isbilermenlerdiń óz jumısın rawajlandırıwı ushın jaqınnan járdem beriw, olardıń mashqalalarına sheshim tabıw boyınsha juwapkerlerge anıq tapsırmalar berildi.

Rayondaǵı bar bolǵan mashqalalardı belgilep alıw maqsetinde kóshe biyleri menen ushırasıw ótkerilip, máhállelerdegi sheshimin kútip turǵan máseleler boyınsha pikirlesildi.

Bunnan soń, rayondı sociallıq-ekonomikalıq jaqtan rawajlandırıw, kámbaǵallıqtı qısqartıw, xalıqtıń bántligin támiyinlew hámde investiciyalıq joybarlardı ámelge asırıw baǵdarındaǵı berilgen tapsırmalar boyınsha is-ilajlar baǵdarlamasınıń orınlanıwı máselelerine arnalǵan májilis ótkerildi.