Xalıqtıń turmıs abadanlıǵın támiyinlew baǵdarında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Moynaq rayonında xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı  húrmetli Prezidentimizdiń 4271-sanlı qararına tiykar, Aziya rawajlanıw bankiniń 8,2 mln. AQSh dolları muǵdarındaǵı qarjıları tiykarında Moynaq rayonında ishimlik suwı támiyinatın jaqsılawǵa qaratılǵan qurılıs jumısları menen tanıstı.

Bunnan soń Toǵay xojalıǵı jer maydanları da kózden ótkerildi. Gúzgi terek egiwge jerlerdi hám nálleri tayarlaw, jumıslardı shólkemleskenlik penen alıp barıw boyınsha juwapkerlerge tapsırmalar berildi. «ARAL AGRO KLUSTER» tárepinen ıssıxanada gúzgi egiske tayarlıq jumısları da kórip shıǵılıp, usınday alıs hám shetki aymaqlardıń birinde jer maydanın dáramat deregine aylandıra alıw kópshilikke úlgi bolıwı kerek ekenligi atap ótildi.

Joqarǵı Keńes Baslıǵı «Úshsay» APJ aymaǵında jaylasqan gaz qudıǵı jumısları menen de jaqınnan tanıstı. Sonday-aq, Ayrıqsha Jaǵdaylar ministrliginiń qurılıs batalonı áskeriy xızmetkerleri menen ushırasıp, olar menen jaqınnan pikirlesti.

 «Doslıq» MPJ aymaǵında jańadan iske túsirilgen nan cexı jumısları da úyrenildi. Isbilermenlerdiń óz jumısın keńeytiwi ushın jaqınnan járdem beriw, olardı hár tárepleme qollap-quwatlaw boyınsha juwapkerlerge anıq tapsırmalar berildi.

Bunnan soń, puqaralardıń turmıs sharayatın jaqsılaw baǵdarında ele de sheshimin kútip turǵan máselelerdi anıqlaw hám mashqalalarǵa sheshim tabıw boyınsha rayondaǵı kóshe biyleri, nuranıy-aqsaqallar hám keywanı hayallar menen ushırasıw ótkerildi.

Ushırasıwdan keyin rayon belsendileri, juwapker basshılar menen birgelikte rayondı sociallıq-ekonomikalıq jaqtan rawajlandırıw máseleleri sın kóz qarasta kórip shıǵıldı.