Partiya maqtanıshı - jurt rawajlanıwı jolındaǵı pidayılarǵa húrmet

Nókis qalasında 1-noyabr - Ózbekstan Xalıq demokratiyalıq partiyası dúzilgeniniń 34 jıllıǵı múnásibeti menen partiyanıń Qaraqalpaqstan Respublikalıq Keńesi tárepinen saltanatlı bayram ilajı ótkerildi.

Onda Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov qatnastı.

Sonday-aq, partiyanıń Qaraqalpaqstan Respublikalıq shólkeminiń xızmetkerleri, partiya sistemasında miynet etken veteranlar hám belsendiler, ǵalaba xabar qurallarınıń wákilleri qatnastı.

Ilajdı Ózbekstan XDP Qaraqalpaqstan Respublikalıq Keńesiniń Baslıǵı, Qaraqalpaqstan Respublikası Joqarǵı Keńesindegi partiya frakciyasınıń basshısı Xalilla Eshimbetov alıp bardı.

Bayram ilajında Qaraqalpaqstan Respublikası Joqarǵı Keńesi Baslıǵınıń orınbasarı Radjapbay Nurazizov barlıq qatnasıwshılardı Ózbekstan Xalıq demokratiyalıq partiyası dúzilgeniniń 34 jıllıǵı bayramı menen qutlıqladı. Ol óziniń shıǵıp sóylegen sózinde partiyanıń elimizde demokratiyalıq reformalardı tereńlestiriw, kúshli puqaralıq jámiyetin qáliplestiriw hám xalıqtıń máplerin qorǵawdaǵı ornı áhmiyetli ekenin atap ótti.

Sonday-aq, partiyanıń sociallıq ádillik principlerine sadıq halda kem támiyinlengen hám járdemge mútáj xalıq qatlamların qollap-quwatlawǵa qaratılǵan baslamaları ayrıqsha atap ótildi.

Ilaj dawamında jámiyettegi sociallıq-siyasiy processlerde belsene qatnasıp, partiyanıń abırayın arttırıwda pidayılıq kórsetip kiyatırǵan veteranlar, deputatlar hám belsendilerdiń miynetleri atap ótildi. Usı múnásibet penen bir qatar qatnasıwshılarǵa partiyanıń Oraylıq Keńesi tárepinen shólkemlestirilgen "Ózbekstan Xalıq demokratiyalıq partiyası maqtanıshı" kókirek belgisi saltanatlı túrde tapsırıldı.

Bayram ilajı qızǵın sóylesiw, óz-ara pikir alısıw hám awızbirshilik ruwxında, "bir kese shay" átirapında dawam etti. Qatnasıwshılar partiyanıń keleshekte ámelge asırılıwı tiyis bolǵan maqset hám wazıypaları boyınsha pikirlesti hám xalıqtıń máplerin qorǵaw jolındaǵı háreketler belgilep alındı.

Ilajda mádeniyat bólimi sheberleri tárepinen atqarılǵan túrli nama-qosıqlar jıynalǵanlarǵa kóterińki ruwx hám bayram keypiyatın baǵıshladı.