Nókis qalasında jańa sawda kompleksi paydalanıwǵa tapsırıldı

Búgin Nókis qalasında xalıqqa xızmet kórsetiwshi «Zor Market» sawda kompleksiniń ashılıw máresimi ótkerildi.

Onda Qaraqalpaqstan Respublikası Ministrler Keńesi Baslıǵınıń orınbasarı – Investiciya hám sırtqı sawda ministri V.Jollıbekov shıǵıp sóylep, sońǵı jılları elimizde isbilermenlikti rawajlandırıw boyınsha húrmetli Prezidentimizdiń qarar hám pármanları tiykarında jaratılǵan sharayatlar haqqında keń túrde atap ótti hám jıynalǵanlardı jańa sawda kompleksi ashılıwı múnásibeti menen jıynalǵanlardı qutlıqladı.

Atap ótilgenindey, Qaraqalpaqstan ushın óz aldına qabıl etilgen qarar hám pármanlar elimizde isbilermenlikti rawajlandırıwǵa, olardıń sanın kóbeytiwge, regionımızdıń investiciyalıq tartımlılıǵın arttırıwǵa, baslısı, jańadan-jańa jumıs orınların jaratıwǵa bekkem tiykar bolıp xızmet etpekte.

«Paint Spring» JShJ tárepinen ulıwma 25 mlrd, sonnan 10 mlrd. sum jeńilletilgen kredit qarjıları tiykarında jańadan qurılıp, paydalanıwǵa tapsırılǵan sawda komlpeksinde búgingi kúnde 80 jumıs ornı jaratılǵan. 

Álbette, jańadan ashılıp atırǵan bunday sawda orınları, jumıssız puqaralardıń bántligin támiyinlep, xalqımız iygiligi jolında xızmet etedi.