Ózbekstan Prezidenti Sociallıq rawajlanıw boyınsha ekinshi Jáhán sammitinde qatnasadı
Ózbekstan Respublikası Prezidenti Shavkat Mirziyoev Qatar Mámleketi Ámiri Shayx Tamim bin Hamad Ol Soniydiń mirát etiwine bola 3-4-noyabr kúnleri Sociallıq rawajlanıw boyınsha ekinshi Jáhán sammitinde qatnasıw ushın ámeliy sapar menen usı mámlekette boladı.
Ilaj dawamında sociallıq-ekonomikalıq rawajlanıwdaǵı ayırmashılıqlardı saplastırıw, Sociallıq rawajlanıw haqqındaǵı Kopengagen deklaraciyasınıń maqset hám principlerine sadıqlıq, sonday-aq, 2030-jılǵa shekem Turaqlı rawajlanıw maqsetlerine erisiwdi jedellestiriw máseleleri kórip shıǵıladı.
Xalıqaralıq birge islesiwdi bekkemlew, milliy strategiyalardı jetilistiriw hám jámiyetlerdiń turaqlılıǵı, sociallıq ádilligi hám inklyuzivligin arttırıwǵa qaratılǵan kompleksli ilajlardı ámelge asırıw máselelerine ayrıqsha itibar qaratıladı.
Sociallıq rawajlanıw boyınsha Jáhán sammiti mámleketler, xalıqaralıq hám regionallıq shólkemler, BMSh sistemasındaǵı strukturalar, puqaralıq jámiyeti institutları, ekspertler hám isbilermen toparlar arasındaǵı konstruktivlik qarım-qatnas ushın áhmiyetli platforma bolıwǵa qaratılǵan.
Forumnıń tiykarǵı maqseti kámbaǵallıqtı saplastırıw boyınsha global háreketlerdi jedellestiriw, tolıq hám nátiyjeli bántlikke járdemlesiw, múnásip miynet sharayatların támiyinlew jáne zamanagóy qáwip-qáterler hám óz-ara baylanıslılıq sharayatında sociallıq integraciyanı keńeytiwden ibarat.
Sammit juwmaǵında turaqlı hám inklyuziv sociallıq rawajlanıw maqsetlerin ámelge asırıw baǵdarında xalıqaralıq sheriklikti bunnan bılay da bekkemlew jáne óz-ara kelisilgen kózqaraslardı rawajlandırıwǵa qaratılǵan Doha deklaraciyasın qabıl etiw rejelestirilgen.