Ózbekstan Prezidenti global sociallıq ádillikti bekkemlew boyınsha baslamalardı alǵa qoydı
Ózbekstan Respublikası Prezidenti Shavkat Mirziyoev 4-noyabr kúni Doxa qalasında ótip atırǵan Sociallıq rawajlanıw boyınsha ekinshi Pútkil jer júzilik sammitte qatnastı.
Ánjuman jumısında Birlesken Milletler Shólkeminiń Bas xatkeri Antoniu Guterrish, Qatar Mámleketiniń Ámiri Shayx Tamim bin Hamad Ol Soniy, BMSh Bas Assambleyasınıń Baslıǵı Annalena Berbok, BMSh Ekonomikalıq hám sociallıq keńesiniń baslıǵı Lok Bahodir Txapa, mámleket hám húkimet basshıları, xalıqaralıq hám regionallıq shólkemlerdiń wákilleri de qatnastı.
Prezidentimiz sóziniń aldında forumǵa joqarı dárejede tayarlıq kórilgeni ushın shólkemlestiriwshilerge minnetdarshılıq bildirip, global sociallıq rawajlanıw ushın áhmiyetli maydan bolǵan sammittiń mine, usı Doxa qalasında ótkerilip atırǵanı úlken rámziy mánige iye ekenin atap ótti.
Mámleketimiz basshısı keyingi jıllarda Qatar sociallıq inklyuzivlik hám jedel rawajlanıw orayına aylanıp atırǵanın atap ótip, bul mámleket xalqın erisilgen tabıslar menen qızǵın qutlıqladı.
Prezidentimiz búgingi kúnde dúnya jámiyetshiligi hám milliy húkimetler sociallıq abadanlıqtı támiyinlew hám xalıqtıń turmıs dárejesin arttırıw jolında birgelikte háreket etip atırǵanın atap ótti. Ózbekstan, óz gezeginde, turaqlı rawajlanıwǵa erisiwge qaratılǵan xalıqaralıq birge islesiwdiń barlıq formatların hám baslamaların bárqulla qollap-quwatlaydı.
Keyingi jıllarda Jańa Ózbekstanda “Insan qádiri ushın” degen princip ústin bolǵan, sociallıq ádillik támiyinlengen, xalıqtıń járdemge mútáj qatlamları nátiyjeli qorǵalǵan sociallıq mámleket qurıw boyınsha keń kólemli jumıslar ámelge asırılmaqta.
– Keyingi jıllarda kámbaǵallıq dárejesin 35 procentten 6,6 procentke shekem qısqartıwǵa eristik. Biz bul joldaǵı reformalardı bunnan bılay da dawam ettiremiz, – dedi Prezidentimiz.
Mámleketimiz basshısı global sociallıq ádillik hám turaqlı rawajlanıwdı bekkemlewge qaratılǵan bir qatar usınıs hám baslamalardı alǵa qoydı.
Kámbaǵallıqqa qarsı gúresiwde xalıqaralıq birge islesiwdi jańa basqıshqa alıp shıǵıw áhmiyetli ekenligi atap ótildi.
– Rawajlanıp atırǵan mámleketlerdiń sociallıq baǵdarlamalarına resurslardı keńnen tartıw maqsetinde kámbaǵallıqqa qarsı gúresiwdiń jańa finanslıq arxitekturasın jaratıw waqtı keldi, dep esaplaymız, – dedi Prezidentimiz.
Usı múnásibet penen kámbaǵallıqtı qısqartıw hám sociallıq teńsizlikti azaytıwǵa ámeliy járdem beretuǵın Global sociallıq ádillik fondın shólkemlestiriw usınıs etildi.
Mámleketimiz basshısı bántlik máselelerin nátiyjeli sheshiw ushın zamanagóy mexanizmlerdi engiziw áhmiyetli ekenligin atap ótti.
Atap ótilgenindey, joqarı texnologiyalar hám jasalma intellekttiń jedel rawajlanıwı dúnya boylap millionlaǵan jumıs orınlarınıń qısqarıwına alıp kelmekte. Bunday sharayatta xızmetkerlerdi qollap-quwatlaw hám sociallıq sheriklik principlerin bekkemlew ushın mámleket, biznes hám jámiyettiń jedel birge islesiwi ayrıqsha áhmiyetke iye.
Prezidentimiz “Sociallıq juwapkershilik hám múnásip miynet boyınsha global baslamanı” islep shıǵıw usınısı qollap-quwatlanatuǵınına úmit bildirdi.
Hámme ushın bilimlendiriw imkaniyatların keńeytiw sociallıq mashqalalardı sheshiwdiń eń nátiyjeli jollarınan biri ekeni atap ótildi.
Ekspertlerdiń esap-sanaqlarına bola, sawatsızlıqtıń jıllıq ekonomikalıq zıyanı 1,4 trillion AQSh dolların quraydı.
Bul Prezidentimizdiń atap ótkenindey, jaslardıń jámiyette hám miynet bazarında óz ornın tabıwın qıyınlastıradı, sociallıq teńsizlikti bolsa kúsheytedi.
Mámleketimiz basshısı kúni keshe bolıp ótken Ashlıq hám kámbaǵallıqqa qarsı gúresiw boyınsha globallıq alyanstıń birinshi májilisinde qabıl etilgen qararlardı Ózbekstan tolıq qollap-quwatlaytuǵının atap ótti.
Alyanstıń bolajaq sammitlerinen birin Ózbekstanda ótkeriw hám bilimlendiriw máselelerin kún tártibiniń tiykarǵı teması etip belgilew usınıs etildi.
Miynet migrantların hám olardıń shańaraq aǵzaların sistemalı qorǵaw zárúrligine ayrıqsha itibar qaratıldı.
Ózbekstan Xalıqaralıq miynet shólkemi hám Xalıqaralıq migraciya shólkemi menen birgelikte Tashkent qalasında migrantlar hám olardıń shańaraq aǵzaların sociallıq-huqıqıy qorǵaw boyınsha xalıqaralıq forum ótkeriwge jáne bul baǵdarda Globallıq baǵdarlamanı qabıl etiwge tayar.
Prezidentimiz klimat ózgeriwiniń sociallıq turmısqa tásiri barǵan sayın kúsheyip atırǵanın atap ótti. Ekstremal hawa-rayı hádiyseleri, shólleniw hám biologiyalıq kóptúrliliktiń joq bolıwı, bárinen burın, xalıqtıń ázzi qatlamları – fermerler, máwsimlik jumısshılar, ekologiyalıq jaǵdayı qıyın bolǵan aymaqlarda jasaytuǵın adamlardıń turmısına unamsız tásir etpekte.
Klimat ózgeriwine qarsı gúresiwdi bántlik baǵdarlamaları menen úylestiriw boyınsha kompleksli ilajlar kóriw zárúr ekenligin atap ótti.
Mámleketimiz basshısı Ózbekstan BMSh tárepinen ekologiyalıq innovaciyalar hám texnologiyalar aymaǵı dep járiyalanǵan Aralboyı regionın sociallıq-ekonomikalıq rawajlandırıwdıń jańa modelin iske qosıw niyetinde ekenin málim etip, bul tájiriybeni dúnya jámiyetshiligi menen bólisiwge tayar ekenin bildirdi.
Sammitte qabıl etilgen qararlar pútkil dúnyadaǵı millionlaǵan adamlarǵa úmit baǵıshlaytuǵını, turaqlılıq hám abadanlıqtı támiyinlewge úlken úles qosatuǵınına isenim bildirildi.
– Xalıqaralıq rawajlanıw jolında sociallıq kelisimdi jańalaw, hár bir insan ushın múnásip turmıs tárizin jaratıw biziń tiykarǵı wazıypamız bolıp esaplanadı, – dedi mámleketimiz basshısı.
Juwmaǵında Ózbekstan Prezidenti sammitte qabıl etilgen Doha siyasiy deklaraciyasın tolıq qollap-quwatlaytuǵının hám onıń barlıq principlerin turmısqa engiziwge tayar ekenin tastıyıqladı.
