Kásiplik awqamları kúnine arnalǵan ilaj ótkerildi

Búgin Nókis qalasındaǵı záwlim orınlardıń birinde 11-noyabr – Ózbekstan Kásiplik awqamları kúnine baǵıshlap, bayram ilajı ótkerildi.

Onda Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov qatnasıp, taraw pidayıların sáne múnásibeti menen qutlıqladı.

Atap ótilgenindey, búgingi kúnde erkin hám abadan turmıs, demokratiyalıq jámiyet qurıw jolında alıp barıp atırǵan túpkilikli reformalar hám olardıń ámeliy nátiyjelerin támiyinlewde kásiplik awqamlarınıń da múnásip úlesi bar. Elimizde ámelge asırılıp atırǵan keń kólemli dóretiwshilik jumısları, «Insan qádiri ushın» degen iygilikli ideya tiykarında turmısqa engizilip atırǵan jańalanıwlarda 120 jıllıq tariyxqa iye Ózbekstan kásiplik awqamları da áhmiyetli orın iyelep kelmekte.

Búgingi ótkerilgen ilajda kásiplik awqamlarınıń jumısı, miynetkeshlerdiń sociallıq-ekonomikalıq mápleri menen huqıqların qorǵaw, xalıqtıń turmıs abadanlıǵın támiyinlewdegi áhmiyeti haqqında sóz etildi.

Sonday-aq, bir topar taraw wákilleri Qaraqalpaqstan Respublikası Joqarǵı Keńesi Prezidiumı qararı menen kókirek belgileri, sonday-aq, bir qatar belsendiler «Wzbekiston kasaba uyushmalarining 120 yilligi» estelik nıshanı menen sıylıqlandı.

Ilaj kórkem óner hám mádeniyat xızmetkerleri atqarıwındaǵı koncert baǵdarlaması menen bir kese shay ústinde dawam etti.