Joqarǵı Keńes Baslıǵı Franciya mámleketiniń Ózbekstandaǵı ayrıqsha hám tolıq huqıqlı elshisi menen ushırastı
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Franciya mámleketiniń Ózbekstandaǵı ayrıqsha hám tolıq huqıqlı elshisi Ualid Fuk penen ushırastı.
Ushırasıwda Franciya mámleketi hám Ózbekstan Respublikası arasındaǵı óz-ara birge islesiwler nátiyjesinde bir qatar kólemli jumıslar ámelge asırılıp atırǵanlıǵı hám usı tiykarda Qaraqalpaqstan Respublikası menen de birge islesiwler jolǵa qoyılǵanlıǵı atap ótildi.
Sonday-aq, Joqarǵı Keńes Baslıǵı sonǵı jılları respublikamızda alıp barılıp atırǵan keń kólemli reformalar, aymaqtı sociallıq-ekonomikalıq jaqtan rawajlandırıw, investiciyalıq tartımlılıqtı arttırıw baǵdarındaǵı hám puqaralardıń turmıs abadanlıǵın támiyinlew boyınsha alıp barılıp atırǵan jumıslar haqqında keń túrde maǵlıwmat berdi.
Elshi tárepinen Franciya mámleketi Qaraqalpaqstan Respublikası mádeniyatı, túrizm potencialı, regiondaǵı ekologiyalıq jaǵday menen tanıs ekenligin, sonday-aq, Nókis qalasında ótkerilip atırǵan Franciya mádeniyatı aylıǵı mádeniy baylanıslardı bekkemlewge xızmet etetuǵınlıǵın bildirdi.
Ótkerilgen ushırasıwda Franciya mámleketi hám Qaraqalpaqstan arasındaǵı óz-ara baylanıstı bekkemlew, sawda, sociallıq-ekonomikalıq, bilimlendiriw, mádeniyat, turizm tarawları boyınsha birge islesiwdi rawajlandırıw máseleleri sóz etildi.
Óz náwbetinde Joqarǵı Keńes Baslıǵı tárepinen respublikamızdaǵı investiciyalıq joybarlardı ámelge asırıw hám sırt elli sheriklerdi keńnen tartıw boyınsha alıp barılıp atırǵan jumıslar menen keńnen tanıstırıp ótildi.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev húrmetli miymannıń respublikamızǵa bolǵan saparınan minnetdar ekenligin bildirip, birge islesiwdi jolǵa qoyıwda hár qanday jańa baslamalardı qollap-quwatlaytuǵınlıǵın, bunıń ushın barlıq múmkinshilikler jaratılıp beriletuǵınlıǵın aytıp ótti.
