Ózbekstan kásiplik awqamları belsendileri hám aǵzalarına
Qádirli watanlaslar!
Mámleketimizdegi eń ǵalabalıq puqaralıq institutınıń aǵzaları bolǵan siz, ázizlerdi 11-noyabr – Kásiplik awqamları kúni menen qızǵın qutlıqlap, bársheńizge ózimniń joqarı húrmetim hám jaqsı tileklerimdi bildiremen.
Álbette, bul bayramnıń elimizde Ózbekstan kásiplik awqamları háreketiniń 120 jıllıǵı keńnen belgilenip atırǵan kúnlerde ótip atırǵanı onıń gózzallıǵın jáne de arttırmaqta.
Bárshemiz jaqsı túsinemiz, Jańa Ózbekstan – bárinen burın, insannıń ómiri, onıń salamatlıǵı, huqıq hám mápleri, qádir-qımbatı nızam tiykarında isenimli qorǵalatuǵın mámleket degeni.
Sonıń ushın óz qatarlarında segiz millionǵa shamalas aǵzanı birlestirgen kásiplik awqamlarınıń miynet tarawındaǵı huqıq hám máplerdi qorǵaw, ádillik hám teńlik principlerin támiyinlew baǵdarındaǵı bir ásirden aslam tájiriybe mektebi elimizde jańa jámiyet, jańa mámleket qurıwda biz ushın oǵada úlken áhmiyetke iye.
Bul haqıyqattı tereń túsingen kásiplik awqamlarınıń belsendileri sociallıq tarawdaǵı baǵdarlamalarımızdı ámelge asırıw, ásirese, kámbaǵallıqtı qısqartıw, bántlikti támiyinlew, jaslar, húrmetli kekselerimiz, áziz hayal-qızlarımızdıń máplerin qorǵawda ayrıqsha jankúyerlik kórsetip kelmekte.
Tek ǵana keyingi 5 jılda sizlerdiń is-háreketlerińiz benen derlik 500 mıń puqaranıń huqıqları tiklengeni, kárxana hám mákemelerde 20 mıńǵa shamalas jámiyetlik qadaǵalaw hám gender teńlikke baylanıslı audit ilajları ótkerilgeni, miynetti qorǵaw boyınsha 21 mıńnan aslam kemshilik saplastırılǵanı, derlik 1 million xızmetker hám olardıń shańaraq aǵzaları, 1 mıń 200 urıs hám miynet frontı veteranları sanatoriylarda salamatlıǵın tiklegeni, 800 mıńnan aslam balalar ushın jazǵı dem alıw imkaniyatları jaratılǵanı dıqqatqa ılayıq.
Mámleketimiz kásiplik awqamlarınıń sırt ellerdegi túrles shólkemler hám xalıqaralıq strukturalar menen birge islesiw baylanıslarınıń bekkemlenip atırǵanı, Federaciyamızdıń onlaǵan xalıqaralıq hám regionallıq shólkemlerge aǵza bolǵanı da onıń keń kólemli jumısınan derek beredi.
Húrmetli doslar!
Jaqında sizler menen ashıqtan-ashıq sóylesiw túrinde ótkerilgen, háreket tariyxına jarqın bet bolıp kiretuǵın ushırasıwda Ózbekstan kásiplik awqamları federaciyası, onıń tarmaqlar hám orınlardaǵı bólimleriniń jumısın hár tárepleme tallap, keleshektegi wazıypalardı anıq belgilep aldıq.
Mine, usı ushırasıwda sizlerdiń kóplegen tarawlarda sociallıq sheriklikti keńeytiw, tásirsheń jámiyetlik qadaǵalawdı ornatıw, múlkshilik túrine qaramastan, barlıq kárxana hám shólkemlerde xızmetkerler, ásirese, rásmiy emes bánt bolǵan puqaralar, hayal-qızlar hám jaslardıń kásipke hám miynetke baylanıslı huqıqların támiyinlew sistemasın kúsheytiw, ulıwma, rásmiy emes bántlikke shek qoyıw boyınsha baslamalarıńız benen tanısıp, taraw xızmetkerleri pútkil xalqımız qatarı óz aldına úlken maqsetler qoyıp jasap atırǵanına jáne bir márte isenim payda ettim.
Hár qıylı sociallıq-ekonomikalıq kelispewshiliklerge tolı bolǵan házirgi quramalı zamanda bunday keń kólemli wazıypalardı ámelge asırıw, álbette, ańsat emes.
Bunıń ushın, bárinen burın, “jasıl” ekonomika hám jasalma intellekt jedel rawajlanıp atırǵan dáwirde miynet bazarında jańasha qatnasıqlar qáliplesip atırǵanı, onlaǵan kásipler boyınsha platformalı bántlik jolǵa qoyılıp atırǵanın esapqa alıp, miynet huqıqların támiyinlew, ómir hám qáwipsizlikti qamsızlandırıwǵa baylanıslı huqıqıy normalardı nızamshılıǵımızda anıq belgilep qoyıwımız, sol tiykarda jańasha jumıs sistemasına ótiwimiz zárúr.
Xalıqaralıq miynet standartların milliy nızamshılıqqa implementaciyalaw hám jámiyetlik turmısqa engiziw, mámleketimizdiń 2026-2030-jıllarǵa mólsherlengen Múnásip miynet boyınsha baǵdarlamasın islep shıǵıw hám kásiplik awqamları jumısınıń kelesi bes jıllıq strategiyalıq baǵdarların belgilep alıw da áhmiyetli másele bolıp esaplanadı.
Mine, usı wazıypalardı nátiyjeli orınlawda óz ómirin insan máplerin qorǵawday iygilikli iske baǵıshlaǵan, tarawda kóp jıllardan berli nátiyjeli xızmet etip kiyatırǵan Ózbekstan kásiplik awqamlarınıń barlıq jankúyer belsendileri hám aǵzaları bay bilim hám tájiriybesin jumsap, pidákerlik penen miynet etedi, dep isenemen.
Óz gezeginde, biz házirgi oǵada áhmiyetli rawajlanıw basqıshında elimizde miynet qatnasıqların jetilistiriwde kásiplik awqamlarınıń mámleketlik uyımlar menen jáne de tıǵız birge islesiwde jumıs alıp barıwı ushın qosımsha sharayatlar menen imkaniyatlardı jaratıp beriwge tayarmız.
Áziz hám húrmetli watanlaslar!
Sizlerdi mámleketimiz kásiplik awqamlarınıń qutlı bayramları menen jáne bir márte qızǵın qutlıqlap, bársheńizge bekkem densawlıq, maqtanıshlı jumısıńızda úlken jetiskenlikler hám áwmetler, shańaraqlarıńızǵa tınıshlıq hám qut-bereket tileymen.
Shavkat Mirziyoev,
Ózbekstan Respublikası Prezidenti