Nókis rayonın taza ishimlik suwı menen támiyinlew baǵdarında jańadan qurılǵan obektler paydalanıwǵa tapsırıldı

Usı jıldıń 11-noyabr kúni Nókis rayonlıq suw támiynatı kárxanasınıń jańa imaratı, rayon xalqın taza ishimlik suw menen támiyinleytuǵın Nasos stanciyaları hám ishimlik suw tarmaqları, sonday-aq, zamanagóy laboratoriyanıń paydalanıwǵa tapsırılıwı múnásibeti menen ashılıw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı qutlıqladı. 

Atap ótiw orınlı, húrmetli Prezidentimizdiń arnawlı qararına tiykar, Aziya rawajlanıw bankiniń 11,4 mln dollar qarjıları tiykarında qurılıs jumısları alıp barıldı. Sonnan, 263 km ishimlik suwı tarmaqları tartılıwı arqalı 31 mıńnan aslam xalıqtıń taza ishimlik suwı menen támiyinleniwi jaqsılanıwına erisildi. Sonday-aq, «Mádeniyat», «Abadan» hám «Kerder» nasos stanciyaları, rayonlıq suw támiynatı kárxanasınıń eki etajlı jańa imaratı, barlıq zamanagóy ásbap-úskeneler menen támiyinlengen laboratoriya qurıp pitkerildi.

Ámelge asırılǵan jumıslar nátiyjesinde rayon xalqın ishimlik suw menen támiyinlew dárejesi aldınǵı 68,4 procentten – 90 procentke jetkeriliwine erisildi.

Álbette, jańadan paydalanıwǵa tapsırılıp atırǵan bul obektler rayon xalqın taza ishimlik suwı menen támiyinlew baǵdarında uzaq jıllar dawamında xızmet etedi.

Ótkerilgen ilaj dawamında qatnasıwshılar ámelge asırılǵan qurılıs jumısları menen jaqınnan tanıstı.