Taqıyatas rayonında xalıqtıń turmıs abadanlıǵın arttırıw boyınsha ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taqıyatas rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı Taqıyatas rayonına kiriw ornında ámelge asırılıp atırǵan abadanlastırıw jumısların kózden ótkerdi.

Bunnan soń «Jayxun» MPJ aymaǵında Sanaatqurılısbank balansındaǵı bos turǵan imaratta «LEDULTRAENERJI» JShJniń karton islep shıǵarıw joybarı, “Grinxaus gold” JShJniń In-vitro usılında nál jetistiriw joybarı, sonday-aq, “Surxon Taxiatosh tekstil” JShJniń tigiw hám trikotaj ónimlerin islep shıǵarıw joybarları kózden ótkerildi. Isbilermenlerdiń jumısın qollap-quwatlaw, olarǵa jaqınnan járdem beriw kerek ekenligi atap ótildi. 

Joqarǵı Keńes Baslıǵı «Markaziy» MPJ aymaǵındaǵı avariyalıq jaǵdaydaǵı úylerde jasap atırǵan puqaralardı sociallıq úylerge kóshiriw jumısları menen tanıstı. Sonday-aq, «Abat mákan» MPJdaǵı sociallıq úyde puqaralar ushın jaratılıp atırǵan sharayatlar kózden ótkerildi.

Taqıyatas diyqan bazarı janınan jańadan qurılıp atırǵan kóp qabatlı sawda kompleksi, sonday-aq, avtomashinalar ushın arnawlı turar ornı qurılıs jumısları da kórip shıǵıldı. Ámelge asırılıp atırǵan jumıslardı jedellestiriwde isbilermenge jaqınnan járdem beriw boyınsha wazıypalar tapsırıldı.

«Qusshılıq» máhállesi aymaǵında Xalıq banki balansındaǵı bos turǵan ıssıxana xojalıǵınıń jumısın qayta jolǵa qoyıw boyınsha ámelge asırıp atırǵan jumıslar da úyrenildi. Rayon aymaǵındaǵı bank balansında bolǵan obektlerdi tolıq quwatlıqta paydalanıwdı jolǵa qoyıw boyınsha juwapkerlerge anıq tapsırmalar berildi.

Joqarǵı Keńes Baslıǵı máhállelerdegi mashqalalardı anıqlaw hám aldaǵı wazıypalardı belgilep alıw maqsetinde kóshe biyleri hám nuranıylar menen ushırasıw ótkerdi. Bunnan keyin rayon belsendileri, juwapker basshılar menen rayondı sociallıq-ekonomikalıq jaqtan rawajlandırıw máseleleri kórip shıǵıldı.