“Jasıl mákan” akciyasına start berildi

Usı jıldıń 15-noyabr kúni Nókis qalasında «Jasıl mákan» ulıwma milliy joybarı sheńberinde gúzgi terek nállerin egiw jumıslarına start berildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizdiń abadanlıǵın, qorshaǵan ortalıqtıń tazalıǵın támiyinlew hám jasıl aymaqlardıń payda etiliwinde pútkil xalqımız benen birge at salısıwımız kerek ekenligin atap ótti.

Ilajda Ministrler Kenesiniń Baslıǵı F.Ermanov, mákeme-shólkem basshıları, belsendi jaslar, nuranıylar, keń jámiyetshilik wákilleri qatnastı.

Atap ótilgenindey, sońǵı jılları húrmetli Prezidentimiz tárepinen mámleketimizde jasıl aymaqlardı keńeytiw hámde ekologiyalıq jaǵdaydı jaqsılawǵa ayrıqsha itibar qaratılmaqta. Ámelge asırılıp atırǵan “Jasıl mákan” ulıwma milliy joybarı sheńberinde qala hám rayonlarda hár túrli dekorativ hám miyweli terek nálleri egiliwi dawam ettirilip atır. 

Bıyılǵı gúzgi terek egiw máwsiminde 8 mln. 781 mıń dana dekorativ hám miyweli terek nállerin egiw, Nókis qalası hám rayon oraylarındaǵı 19 gektar maydanda «Jasıl jámiyetlik park»ler jaratıw rejelestirilgen. Bul ilajlardı joqarı dárejede shólkemlestiriw maqsetinde pitomniklerde 10 mln. danadan artıq dekorativ hám miyweli terek nálleri jetistirilmekte.

Búgingi ilajda tayarlanlanǵan jer maydanlarına jaqsı niyetler menen terek nálleri otırǵızıldı.