Xojeli rayonında xalıqtıń turmıs jaǵdayın jaqsılaw baǵdarında ámelge asırılıp atırǵan jumıslar úyrenildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Xojeli rayonında xalıqtıń turmıs sharayatın jaqsılaw baǵdarında ámelge asırılıp atırǵan jumıslar menen tanıstı.

Dáslep, Joqarǵı Keńes Baslıǵı «Sarıshúngil» awıl puqaralar jıyını aymaǵındaǵı Tawsha aymaǵına bardı. Atap ótiw kerek, bul jerde aldın 149 úyde puqaralar termitten zıyan kórip, jasap atırǵan edi. Bul mashqalanıń sheshimi tawılıp, derlik barlıq xojalıqlardıń qáwipsiz orınǵa kóshiriliwi támiyinlendi.

Bunnan soń, «Baǵman» MPJ aymaǵındaǵı «Balıq YuK» JShJ tárepinen jolǵa qoyılǵan balıq jetistiriw joybarı sonday-aq, «Qumbız» MPJdaǵı «Qırıq qız» JShJ tárepinen jolǵa qoyılǵan tigiwshilik kárxanası jumısları kózden ótkerildi. Isbilermenlerdiń óz jumısın keńeytiwi ushın barlıq ámeliy járdemlerdi kórsetiw, olardı qollap-quwatlaw boyınsha juwapkerlerge tapsırmalar berildi.

«Párwaz» MPJ aymaǵında jolǵa qoyılǵan «Kingsman» jeke menshik mektebi jumısları da úyrenildi. Ulıwma bilim beriw mákemeleri menen birge mámleketlik emes mekteplerdiń jumısı jolǵa qoyılıwı bilimlendiriw sapasın ele de arttırıwǵa xızmet etiwi hám bunday mekteplerdi ele de kóbeytiw kerek ekenligi atap ótildi.

Joqarǵı Keńes Baslıǵı «Farruxbek Xojeli» fermer xojalıǵı tárepinen jolǵa qoyılǵan sharwashılıq joybarı menen de jaqınnan tanıstı. Jańa jumıs orınların jaratıwǵa qaratılǵan bunday joybarlar baslamashıları barqulla qollap-quwatlanıwı kerek ekenligi ayrıqsha tilge alındı.

Puqaralardıń turmıs sharayatın jaqsılaw baǵdarında ele de sheshimin kútip turǵan máselelerdi anıqlaw hám mashqalalarǵa sheshim tabıw boyınsha rayondaǵı kóshe biyleri, nuranıylar menen ushırasıw ótkerilip, ámelge asırıwı tiyis wazıypalar belgilep alındı.

Bunnan soń, rayon belsendileri qatnasıwında májilis ótkerilip, rayondı sociallıq-konomikalıq jaqtan rawajlandırıw máseleleri talqılandı.