«Tax-tóbe» etno awılında Xalıqaralıq etno-mádeniy festivalı ótkerildi

Búgin Taxtakópir rayonınıń «Beltaw» elatında, «Tax-tóbe» etno awılında Xalıqaralıq etno-mádeniy festivaldıń ashılıw saltanatı ótkerildi. 

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq jıynalǵanlardı festival ashılıwı múnásibeti menen qutlıqladı. 

Ilajda Ózbekstan Respublikası Prezidentiniń keńesgóyi T.Xudaybergenov, Ministrler Keńesiniń Baslıǵı F.Ermanov, Qazaqstan Respublikasınıń ayrıqsha hám tolıq huqıqlı elshisi Beybut Atamkulov qatnastı.

Atap ótilgenindey, ásirler dawamında túrli millet wákilleri bir xalıq bolıp, awızbirshilikli túrde jasap, elimiz rawajlanıwına óziniń múnásip úlesin qosıp kelmekte.

Húrmetli Prezidentimizdiń ayrıqsha itibarı menen qayta ómir baǵıshlanǵan «Beltaw» elatında keń kólemli qurılıs-ońlaw hám abadanlastırıw jumısları alıp barılıp, búgin shın mánisinde jańasha kelbetine iye boldı. bul elat janında «Bórshi taw» tóbesinde qurılǵan, ótmishimizden derek beriwshi, milliyligimizdi ózinde jámlegen «Tax-tóbe» etno-awılı aymaqqa jáne de ózgeshe sán, ózgeshe shıray baǵıshlamaqta.

Búgingi ótkerilgen etno-mádeniy festivaldıń áyne usı orında ótkerilgenliginde úlken mazmun bar. Sebebi, bul jerde shólkemlestirilgen 70 Qara úy elimizde jasap atırǵan túrli millet wákilleriniń ózligin sáwlelendirip turǵan bolsa, qońsı awıl kórinisin ózinde jámlegen 16 Paxsa úyler arqalı ata-babalarımızdıń jasaw sharayatları menen jaqınnan tanısıw imkaniyatına iye bolamız.

Ótkerilgen festival sheńberinde shólkemlestirilgen túrli ilajlar, tuwısqan xalıqlardıń milliy úrp-ádet hám dástúrlerin ózinde jámlegen túrde sahnalastırılǵan kórinisler, milliy ayaq oyın hám qosıqlar atqarılıwı, xalqımızdıń milliy oyınları, baqsı hám jırawlardıń ájayıp shıǵıwları hámmege birdey unadı. 

Joqarı dárejede shólkemlestirilgen festival sırt elden kelgen miymanlar, jergilikli qatnasıwshılarda úlken tásirler qaldırdı.