Ózbekstan Respublikası Prezidenti Shavkat Mirziyoevtiń Prezident Olimpiadası oyınlarınıń ashılıw máresimindegi shıǵıp sóylegen sózi

Assalawma áleykum, qádirli watanlaslar!

Húrmetli veteranlar, ustaz hám trenerler, kúsh-ǵayratlı ul-qızlarım!

Húrmetli miymanlar!

Búgin sizler menen Jańa Ózbekstannıń tımsalı bolǵan mine, usı sawlatlı Olimpiada qalashasında Prezident Olimpiadacına start berip atırmız.

Mámleketimizde birinshi márte ótkerilip atırǵan, pútkil elimiz jasların Olimpiada háreketiniń iygilikli ideyaları tiykarında birlestirip atırǵan bul sport bayramı bárshemizge múbárek bolsın!

Áziz doslar!

Biz reformalarımızdıń dáslepki kúnlerinen-aq barlıq tarawlar qatarında denetárbiya hám sporttı rawajlandırıwǵa da úlken itibar qaratıp atırmız. Keyingi segiz jılda byudjetten sportqa berilip atırǵan jıllıq qarjı 250 milliard sumnan 3 trillion sumǵa arttı; trenerlerdiń ortasha miynet haqısı 7 esege kóbeydi; 250 den aslam iri sport obektleri jańadan qurıldı, 100 ge shamalas obekt rekonstrukciyalandı; máhállelerde, ásirese, shetki awıllarda 2 mıńǵa shamalas sport maydanshaları qurıldı, olardıń sanın hár jılı 500 ge arttırıp barmaqtamız; 14 olimpiada hám paralimpiada orayları tolıq zamanagóy infrastruktura menen támiyinlendi.

Bul jumıslarımız elimizdiń abıraylı xalıqaralıq jarıslarda joqarı nátiyjelerge erisiwi hám sportı joqarı dárejede rawajlanǵan mámleketler qatarınan orın alıwı ushın bekkem tiykar jaratpaqta. Sonıń ishinde, Parij Olimpiada hám Paralimpiada oyınlarında márt hám bahadır sportshılarımız haqıyqıy mártlik kórsetip, 13-orındı iyelegeni hár qanday maqtawǵa ılayıq bolıp esaplanadı.

Mine, usınday tabıslı júristiń dawamı sıpatında bıyılǵı jılı jaslarımız Jáhán universiadasında 13-orındı, Baxreynde ótkerilgen Jaslar oyınları hám Saudiya Arabstanındaǵı Islam tileklesligi jarıslarında sıylı 2-orındı iyeledi.

Ásirese, ul-qızlarımız dúnya, Aziya hám Olimpiada oyınlarında 50 den aslam rekord nátiyjelerge eriskeni elimizdiń xalıqaralıq Olimpiada háreketindegi ornın hám abırayın anıq kórsetip tur.

Futbol boyınsha Ózbekstan milliy saylandı komandası birinshi márte jáhán chempionatına jollamanı qolǵa kirgizgeni xalqımız 34 jıl kútken tariyxıy waqıya boldı.

Usı kúnlerde shaxmat boyınsha jáhán kuboginiń yarım finalında bir waqıttıń ózinde 2 shaxmatshımız qatnastı. Jańa ǵana xosh xabar aldıq. 19 jasar xalıqaralıq grossmeysterimiz Javohir Sindorov Hindstanda ótip atırǵan bul abıraylı turnirde jeńimpaz bolıp, jáhán kubogin qolǵa kirgizdi. Endi ol jáhán tajı ushın talabanlar turnirinde qatnasadı hám bunday nátiyjeler pútkil xalqımızdı quwandıradı.

Jańa Ózbekstannıń sport tariyxın mine, usınday bekkem erk-ıqrarlı, márt hám jigerli, joqarı intellektuallıq potencialǵa iye júzlegen ul-qızlarımız jaratıp atırǵanına gúman joq.

Bunday qaharman sportshılarımızǵa dańq bolsın! Olardıń bası ústinde Watanımız bayraǵı hámiyshe maqtanıshlı jelbirep tursın!

Húrmetli ilaj qatnasıwshıları!

Álbette, erisilgen nátiyjeler ózimizdiki. Eń áhmiyetlisi, izleniw hám háreketten toqtap qalmawımız kerek.

Dúnyada barlıq tarawlar qatarında sportta da qanday keskin gúres hám báseki bolıp atırǵanın hámmemiz kórip turmız. Bul bolsa abıraylı xalıqaralıq sport jarısları, sonıń ishinde, Olimpiada oyınlarına tayarlıq sistemasın jáne de jetilistiriwdi talap etpekte.

Bul jumıslardı eń tómengi buwın bolǵan máhálleden baslaw ushın usı jılı bes basqıshlı ǵalabalıq sport jarısları sistemasına 15 million xalıq qamtıp alındı.

Adaptiv sportqa berilip atırǵan itibar sebepli keyingi úsh jılda parasportshılardıń sanı derlik 7 esege artıp, 70 mıńnan aslam mayıplıǵı bolǵan shaxslar ǵalabalıq sportqa tartıldı.

Tarawdı sanlastırıp, ashıq-aydın sistema jaratqanımız esabınan barlıq 10 mıń mektep hám 9 mıń máhálledegi ul-qızlarımız óz potencialın kórsetiw imkaniyatına iye boldı.

Endi eń qábiletli jaslardı selekciyalaw hám olardı úlken sportqa baǵdarlaw boyınsha pútkilley jańa sistema – Prezidentlik Olimpiada oyınların baslap atırmız.

Jarıstıń rayonlıq hám wálayatlıq basqıshlarında ulıwma bilim beriw mekteplerindegi sport dógerekleri, jeke menshik sport klubları hám 310 sport mektebinen 100 mıńnan aslam jaslarımız qatnastı.

Wálayat hákimleri ózleri basshılıq etip, orınlarda eń joqarı nátiyjege erisken 3 mıńnan aslam ul-qızlarımızdı Prezident olimpiadasına alıp keldi. Olar sporttıń 10 baǵdarı boyınsha óz-ara bellesiwlerdi basladı. Jeńimpazlar arnawlı sawǵalar hám aqshalay sıylıqlar menen sıylıqlanadı. Eń tiykarǵısı, olar saylandı komandalarǵa tikkeley baǵdarlanadı.

Joqarı dárejedegi tayarlıqtı dawam ettiriw ushın olar Olimpiada hám Paralimpiada oraylarına qabıl etiledi hám hár birine stipendiya beriledi.

Bir sóz benen aytqanda, bunnan bılay hár jılı ótkeriletuǵın Prezident olimpiadası jańa talant iyelerin ashıp, nátiyjeli selekciya sistemasına aylanadı.

Kelesi jıldan baslap suw sportı, velosport, triatlon, qılıshlasıw hám komandalıq oyınlar boyınsha da jarıslar ótkerilip, Prezident olimpiadasındaǵı sport túrleri 20 ǵa jetkeriledi.

Sport ministrligi, Olimpiada komiteti, sport federaciyaları Prezident Olimpiadasınıń hár bir basqıshına xalıqaralıq sport talapların tolıq engizedi; joqarı sheberlikten paydalanatuǵın sportshılardı tayarlaw ushın trenerlerdi zamanagóy metodologiya hám kózqaraslar tiykarında oqıtıw sistemasın jolǵa qoyadı; jarıs nátiyjelerin ashıq-aydın bahalaw ushın tóreshilerdiń potencialın arttırıp baradı.

Wálayat hákimleri sport túrlerinen kelip shıǵıp, sport mektepleri hám dógereklerindegi sharayatlardı jaqsılap, zamanagóy inventarlar menen tolıq támiyinleydi; hár jılı keminde 10 máhállede zamanagóy sport zalların qurıp, jeke menshik sport klublarınıń basqarıwına beredi.

Xabarıńız bar, kelesi jılı 46-Pútkil jáhán shaxmat olimpiadası, 2027-jılı 20 jasqa shekemgi futbolshılar arasında jáhán chempionatı hám 2029-jılı Jaslar Aziya oyınları Ózbekstanda ótkeriledi.

Búgingi ilajımız bolıp ótip atırǵan bul sawlatlı Olimpiada qalashası, orınlarda qurılıp atırǵan zamanagóy sport infrastrukturaları mine, usınday abıraylı xalıqaralıq turnirlerdi joqarı dárejede shólkemlestiriw ushın úlken tiykar jaratpaqta. Bunday iri jarıslar xalqımız, ásirese, jaslarımız ushın úlken bayram, úlken sheberlik mektebi boladı, mámleketimizdiń doslıq hám birge islesiw eli sıpatındaǵı xalıqaralıq abıray-mártebesin jáne de arttıradı.

Prezident Olimpiadası sisteması bolsa bunday jarıslarǵa gáwhar sportshılardı tańlap alıwǵa, atap aytqanda, 2028-jılı Los-Anjeleste ótetuǵın Olimpiada oyınları ushın hár bir aymaqtan licenziyalar sanın kóbeytiwge xızmet etetuǵını sózsiz.

Keleshekte olardıń arasınan Bahodir Jalolov, Uluǵbek Rashidov, Diyora Keldiyorova, Akbar Jwraev sıyaqlı jáhán hám Olimpiada chempionları álbette jetisip shıǵatuǵınına isenemen.

Húrmetli ánjuman qatnasıwshıları!

Danıshpanlar aytqanınday, erk-ıqrarı kúshli insandı, xalıqtı hám milletti jeńip bolmaydı.

Ásirese, sport qanday ullı kúsh, qanday joqarı órnek hám úlgi ekenin búgingi saltanatlı máresimde qatnasıp atırǵan siz, húrmetli sportshılarımız, taraw veteranları, ustaz-trenerler jaqsı bilesiz.

Eger sizler ózińizdegi úlken tárbiyalıq potencial hám turmıslıq tájiriybeni jaslarımızǵa sińdirseńiz, olardı bilimli hám aqıllı, watansúygish insanlar etip tárbiyalawǵa úles qossańız, sizlerden xalqımız da, Prezident te minnetdar boladı. Sebebi hár qıylı zıyanlı ideya hám tásirler kúsheyip baratırǵan házirgi qıyın dáwirde jas áwladımızdı hár tárepleme salamat etip tárbiyalaw sheshiwshi áhmiyetke iye bolmaqta.

Men bul baǵdarda sporttı tárbiyadan, tárbiyanı bolsa sporttan ajıratıp kóz aldına keltire almaytuǵın sizdey húrmetli sportshılar, veteranlarımız hám ustaz-trenerlerge súyenemen.

Áziz sportshı ul-qızlarım!

Hesh qashan umıtpań, sizler mámleketimizde birinshi márte ótkerilip atırǵan Prezident olimpiadasınıń qatnasıwshılarısız. Áne, usınday at penen tariyxqa kiresiz. Bul joqarı mártebege múnásip bolıp, hámmeńiz sheberlik, hadallıq hám mártlik úlgilerin kórsetesiz dep isenemen.

Sporttıń qıyın hám juwapkershilikli jolında ele sizlerdiń moynıńızda áziz Watanımız bayraǵın bálent kóterip, onı dúnyaǵa tanıtıwday ullı wazıypalar turıptı.

Mine, usınday ullı hám muqaddes wazıypanı orınlawǵa házirden tayar bolıń!

Izleniw, úyreniw hám shınıǵıwdan hesh qashan toqtamań!

Bárqulla kúsh-ǵayrat hám isenim menen, anıq alǵa basıń!

Bul jolda mámleketimiz, Prezident sizler ushın barlıq zárúr sharayatlardı jaratıp beredi.

Bársheńizge áwmet hám tabıslar yar bolsın, áziz perzentlerim!