Evropa Awqamı menen sawda-ekonomikalıq hám investiciyalıq birge islesiwdi keńeytiw zárúr ekenligi atap ótildi

Ózbekstan Respublikası Prezidenti Shavkat Mirziyoev ámeliy sapar menen elimizde bolıp turǵan Evropa Awqamınıń Xalıqaralıq sheriklikler boyınsha komissarı Yozef Sikela hám Keńeyiw máseleleri boyınsha komissarı Marta Kos basshılıǵındaǵı delegaciyanı qabılladı.

Sawda-ekonomikalıq hám investiciyalıq birge islesiwdi usı jılı oktyabr ayında Bryusselge joqarı dárejedegi sapar dawamında erisilgen kelisimlerdi ámelge asırıw arqalı rawajlandırıw máseleleri dodalandı.

Evropa Awqamınıń wákilleri Ózbekstan Prezidentine Evropa keńesiniń Prezidenti Antoniu Koshta hám Evropa komissiyasınıń Prezidenti Ursula fon der Lyayenniń qızǵın sálemin jetkerdi.

Ózbekstan jetekshisi evrokomissarlardı Tashkentte “Oraylıq Aziya – Evropa Awqamı” úshinshi ekonomikalıq forumı hám Transkaspiy transport koridorı jáne óz-ara baylanıslılıq boyınsha investorlar forumınıń tabıslı ótkerilgeni, juwmaǵında regionallıq kólemdegi bir qatar jańa birgeliktegi joybarlar iske qosılǵanı menen qutlıqladı.

Ózbekstan – Evropa qatnasıqları jedel rawajlanıp atırǵanı, eki hám kóp tárepleme birge islesiwdiń jańa keń kólemli kún tártibi qáliplestirilgeni qanaatlanıwshılıq penen atap ótildi.

Bıyıl Evropa Awqamı menen Keńeytilgen sheriklik hám birge islesiw haqqındaǵı kelisimge qol qoyıldı, Samarqand hám Bryusselde sammitler bolıp ótti, Ózbekstannıń JSShǵa aǵza bolıwı boyınsha Evropa Awqamı menen sóylesiwler juwmaqlandı.

Jıldıń basınan berli tovar almasıw derlik 7 procentke ósti. KShHKniń ámeliyatqa engiziliwi sawda kólemi hám investiciyalar aǵımınıń sezilerli dárejede artıwına xızmet etetuǵını atap ótildi.

Sawdanı keńeytiw hám diversifikaciyalaw ushın birge islesiwdiń institucionallıq mexanizmlerin bunnan bılay da jetilistiriw, sanaat kooperaciyası, transport, sanlastırıw, áhmiyetli minerallar, energetika, densawlıqtı saqlaw hám basqa da tiykarǵı tarawlarda jáne jańa qospa investiciyalıq joybarlardı islep shıǵıw zárúr ekenligi atap ótildi.

Xalıqaralıq hám regionallıq kún tártibindegi áhmiyetli máseleler boyınsha da pikir alısıldı.