Respublika hayal-qızlar konferenciyası bolıp ótti
Búgin Nókis qalasında hayal-qızlardıń ekonomikalıq belsendiligin arttırıw, isbilermenlik hám ónermentshiliktegi qatnasına baǵıshlanǵan "Hayal-qızlar ushın sheksiz imkaniyatlar: Qaraqalpaqstan tájiriybesi" atamasındaǵı respublikalıq konferenciya bolıp ótti.
Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Ózbekstan Respublikası Bas ministriniń orınbasarı - Shańaraq hám hayal-qızlar komitetiniń baslıǵı Zulayho Mahkamova qatnasıp, Húrmetli Prezidentimizdiń basshılıǵında elimizde hayal-qızlardı hár tárepleme qollap-quwatlaw, olardıń isbilermenlik baslamaların xoshametlew hám jaratılǵan imkaniyatlar haqqında toqtap ótti.
Sońǵı 3 jılda 1 mıń 400 den aslam hayal-qızlar turaqlı turaq jay menen támiyinlendi, "Hayallar dápteri" baǵdarlaması sheńberinde 193 mıńnan aslam hayal-qızlarǵa jámi 292 milliard sumlıq ámeliy járdem kórsetildi, sociallıq qorǵawǵa mútáj 450 den aslam student-qızlarǵa jámi 3,5 milliard sumlıq shártnama pulları tólep berildi.
Ekonomikalıq belsendilik hám isbilermenlikti rawajlandırıw maqsetinde shólkemlestirilgen respublikalıq konferenciyada 300 belsendi hayal-qızlar hám Tashkent qalasınan juwapkerler qatnastı.
Ilaj dawamında hayal-qızlardıń isbilermenlik hám ónermentshilik ónimleriniń yarmarkası shólkemlestirildi, bul arqalı olardıń potencialı hám jergilikli óndirislik imkaniyatları keń jámietshilik itibarına usınıldı.
Konferenciya dawamında hayal-qızlardıń bántligin támiyinlew, isbilermenlik hám ónermentshilikti qollap-quwatlaw, mamanlıq hám potencialdı arttırıw jáne jańa imkaniyatlar jaratıw máseleleri dodalandı.
