Aral teńiziniń qurıǵan ultanında ilimiy-izertlew stanciyası ashıldı

Búgin Aral teńiziniń qurıǵan ultanında shólkemlestirilgen ilimiy-izertlew stanciyası ashıldı

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası Awıl xojalıǵı ministri I.Abduraxmonov hám Innovaciyalıq rawajlanıw agentligi direktorı A.Norov qatnastı.

Atap ótilgenindey, húrmetli Prezidentimizdiń basshılıǵında Aralboyı aymaǵında xalıqtıń turmıs dárejesin jaqsılaw, ekologiyalıq turaqlılıqtı támiyinlew hám jergilikli ekosistemanı tiklewge qaratılǵan keń kólemli jumıslar ámelge asırılmaqta.

2022-jılı Húrmetli Prezidentimizdiń Qaraqalpaqstan Respublikasına saparı dawamında Aral ultanında ekologiyalıq hám ilimiy izertlewler alıp barıw jáne bar bolǵan mashqalalarǵa nátiyjeli sheshim tabıw boyınsha tiykarǵı wazıypalar belgilengen edi. Usı tiykarda ótken jıllar dawamında ulıwma bahası 15,7 milliard sumlıq 17 joybar qarjılandırılıp, usı jılı 57,1 milliard sumlıq 21 joybar ámelge asırılmaqta.

Usınday joybarlar qatarında paydalanıwǵa tapsırılǵan stanciya ekologiyalıq tiklew jumısların nátiyjeli qadaǵalaw, shorǵa shıdamlı ósimliklerdiń ósiwin baqlaw hám nátiyjeli ilimiy izertlew jumısların alıp barıwda áhmiyetli esaplanadı.

Jańa ilimiy-izertlew stanciyası tek ǵana tábiyattı qorǵaw emes, al regiondaǵı ilimiy izertlewler hám ekologiyalıq izlenisler ushın oray sıpatında xızmet etedi hám Aralboyı aymaǵınıń turaqlı rawajlanıwına múnásip úles qosadı.