Xalıqaralıq mayıplıǵı bolǵan shaxslar kúni belgilendi
Búgin paytaxtımız Nókis qalasında 3-dekabr – Xalıqaralıq mayıplıǵı bolǵan shaxslar kúni múnásibeti menen ilaj bolıp ótti.
Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev sózge shıǵıp, elimizde húrmetli Prezidentimiz basshılıǵında xalqımız, sonıń ishinde, sociallıq járdemge mútáj, mayıplıǵı bolǵan insanlarǵa ámeliy járdem kórsetiw hám olardı qollap-quwatlaw baǵdarında ámelge asırılıp atırǵan jumıslar haqqında aytıp ótti.
Atap ótilgenindey, sońǵı jılları elimizde mámleketimiz basshısı tárepinen «Insan qádiri ushın» hám «Hesh bir insan itibar hám mehirden shette qalmawı kerek!» degen iygilikli ideya tiykarında keń kólemli reformalar ámelge asırılmaqta.
Imkaniyatı sheklengen shaxslardı qollap-quwatlaw, olardıń nızamlı máplerin qorǵaw, medicinalıq-sociallıq járdem kórsetiw, turmıs dárejesin jaqsılaw, zárúrli bilim hám kónlikpelerge iye bolıw, dene tárbiya hám sport penen shuǵıllanıwı ushın barlıq sharayatlar jaratılmaqta.
Álbette, bunday ilajlardı ámelge asırıwda arnawlı baqshalar, mektep-internatları hám «Múriwbet» úyleri áhmiyetli orın tutpaqta.
Eń áhmiyetlisi, mayıplıǵı bolǵan shaxslardı qollap-quwatlaw boyınsha qabıl etilip atırǵan párman hám qararlar bul baǵdardaǵı ilajlardı jańa basqıshlarǵa kótermekte.
Atap aytqanda, mayıplıǵı bolǵan shaxslardı qollap-quwatlaytuǵın Sociallıq qorǵaw milliy agentliginiń shólkemlestirildi, sonday-aq, bıyılǵı jıl basınan berli 7 706 puqaraǵa 10 milliard sumlıq protez-ortopediya hám reabilitaciya texnikalıq buyımları berildi, reabilitaciyalıq oraylarda 1 300 den aslam puqaranıń salamatlıǵı tiklendi.
Sonıń menen birge, kekse hám mayıplıǵı bolǵan 3 mıńnan aslam puqaralarǵa sanatoriyalarǵa jollamalar, mayıplıǵı bolǵan shaxslardı jumısqa alǵan 1033 kárxanaǵa bolsa 9 milliard 525 million sumlıq salıq jeńilligi berildi, sonday-aq, 6 mıńnan aslam mayıplıǵı bolǵan shaxslar jumısqa ornalastırıldı.
Bıyılǵı jıldan baslap barlıq jańadan qurılıp atırǵan mektepler mayıplıǵı bolǵan shaxslarǵa qolaylastırıldı, qala hám rayonlardaǵı 13,5 km uzınlıqtaǵı kósheler mayıplıǵı bolǵan shaxslardıń erkin háreketleniwi ushın beyimlestirilmekte.
Bunnan tısqarı, búgingi kúnde 25 sport orayında shólkemlestirilgen 15 sport dógereginde 600 den aslam para-sportshılar turaqlı shuǵıllanıp kelmekte.
Ayrıqsha atap ótiw orınlı, mayıplıǵı bolǵan balalardı jámiyetke aralastırıw hám salamatlıǵın tiklew maqsetinde 41 orında shólkemlestirilgen «Kúndizgi kutim xızmeti»ne 273 bala qamtıp alındı.
Áhmiyetlisi, mayıplıǵı bolǵan shaxslar bárqulla dıqqat-itibarda bolǵanlıǵı sebepli olar túrli tarawlarda nátiyjeli miynet etip, elimizdiń gúllep-rawajlanıwına ózleriniń salmaqlı úleslerin qosıp kelmekte.
Ilaj sheńberinde búgingi sáne múnásibeti menen mayıplıǵı bolǵan shaxslarǵa sawǵalar tapsırıldı.
Kórkem óner ǵayratkerleri hám mayıplıǵı bolǵan shaxslardıń birgelikte atqarıwındaǵı inklyuziv koncert baǵdarlaması qatnasıwshılardıń kewillerine kóterińkilik baǵıshladı.
